Rohingya chungchang ngaihtuahnaa te loh vangin BJP member suspend

Assam-ah tun hnai khan pawl hrang hrangte chuan Rohing­ya refugee-te chungchang ngaih­tuahin meeting an nei a, he hunah hian Bharatiya Janata Party (BJP) executive member Benazir Arfan-i chu a tel loh avangin, an party chuan a suspend nghal.

Meeting-ah hian Myanmar-a Rohingya Hindu leh Muslim-te chungchang ngaihtuah a ni a, Benazir Arfan-i pawh hi tel tura sawm a ni. Mahse meeting-ah hian a tel loh avangin, BJP chuan an party aṭanga suspend a nih thu an sawi. Arfan-i chuan sawmna a dawn ngei thu sawiin, a tel theih loh chhan erawh a sawi lo. A tel loh chhan hi a sawifiah hmain party aṭanga susupend a nih thu a dawng zui ta tih a sawi. Suspend a nih thu hi whatsapp kaltlanga hrilh a nih thu a sawi a, a lungawi lo hle. Hemi chungchangah hian state BJP president Ranjeet Das chu mawhphurtuah puhin, an party chu Taliban-te inkaihhruaina anga kalpui tumah a puh.

Hetih rual hian Arfan-i hian thupha a chawi tawh a, meeting-a a tel theih loh chhan midang a hriattir lo chu pawi a tih thu a sawi. Arfan-i hian heng Rohingya refugee-te tan hian ṭawngṭai sak aiin, an chunga Myanmar sorkar chetdan duh lohna lantira nawrh huaihawt a ṭhat zawk thu facebook-ah a lo post tawh bawk a, he a thu post avang hian ngaihdam a dil bawk.

Rohingya Muslim-te'n tih­duhdahna an tawrh avang hian himna zawngin hmun tam tak an pan a, Bangladesh bakah, India chu an pan nasa a ni. Hetih lai hian refugee-te hi dan loa India rama an rawn luh lohna turin sorkar laipui chuan hma a la mek a, hmarchhak state-te chu inralring tura hriattir an ni. India- Myanmar Border-ah pawh venhimna khauh zawka kalpui a ni bawk.