Naga politics buaina chinfel thuai a ni ang : Nagaland Governor

Nagaland Governor PB Acharya chuan Naga politics buaina chu hun reiloteah chinfel a nih tur thu a sawi a, hemi tihlawhtling tur hian Naga hel pawl hrang hrangte leh NGO leh political party-te an pawimawh dawn tih a sawi.

Governor chuan he thu hi Raj Bhavan-a thu­thar thehdarhtuten an kawmnaah a sawi a, remna leh muanna a awm theihna turin theihtawp chhuahin hma lak zel a nih tur thu a sawi. Naga politics buai­na chu hmasawnna tiṭhuan­awptu a nih thu sawiin, chinfel vat a ngai a ni, a ti. Rorel lai Naga Peoples’ Front (NPF) chuan buaina chingfel tur hian dinhmun pwimawh tak an chang tih sawiin, party dangte pawh remna zawnga hmalaknaa thawhpui atan a sawm. Hetih rual hian Naga hel pawl hrang hrangte chu inremna tiṭhuanawp theitu an nih avngin an pawi­mawh hle dawn tih a sawi.

Nagaland-ah hian NPF party chhungah buaina a awm avangin hun eng emaw chen harsatna an tawk tawh a, chief minister Shurhozelie Liezietsu chu July 19 khan paihthlak niin, TR Zeliang chu CM atan lakluh zui a ni. NPF hian party mi leh sa eng emaw zat an sus­pend a, chief minister Zeliang-a ngei pawh party aṭangin kum ruk chhung atan hnawhchhuah a ni bawk. Mahse heng zawng zawng chingfel a nih theih nan hian Governor chuan hma lak a nih thu sawiin, hun reiloteah chinfel an inbeisei tih a sawi a ni.