Manipur-ah chhungkaw 600-in tuilian tuar leh

Manipur-a Kakching district-ah chuan chhung­kaw 600 vel zet chuan tuilian vangin harsatna an tawk leh a, hei hi tun hnaiah nasat taka ruah a sur leh vang a ni.

Kakching district deputy commissioner Nei­lenthang Telienna chuan tuilian hian chhung­kaw 600 vel zet tan harsatna a thlen a, heng mite awm lailawkna tur hi ngaihtuah sak an nih thu a sawi. Hmun hrang hrangah relief camp siam a ni a, heng hmunah te hian awm lailawk tir an ni. Kakching bakah hian Chandel district hmun ṭhenkhatah pawh tuilian hian harsatna a thlen a, Chakpi bridge dawh mek pawh a lenchhia a ni. Deputy commissioner Neilenthang Telienna leh sorkar mi pawimawhte chuan tuilenna hmun te hi an tlawh nghal a, Serou khuaah chuan chenna-in 20-30 vel chu tuilian hian a la tih a sawi.

Serou, Sugnu, Khao­buk, Wapokpi, Tangjeng, Khongyam, Nungoo, Chairel, Pangantabi leh Kakching Khunou khua te chuan harsatna hi an tawk nasa zual a, nunna chan erawh an awm hriat a ni lo. Wabagai assembly constituency-a khaw hrang hrang - Keirak,Wabagai, Thingel Leikai,Wabagai Tera Urak, Kakching Kendrada Kakching Chumnang Leikai, Kakching Wairi, Hiyanglam leh Lamjao-a chengte pawh hmun him lamah sawn chhuah an ni. Relief camp 19 siam a ni tawh a, heng hmunahte hian ei leh in tur sem chhuah nghal a ni.

Thuneitute chuan tun hnaiah ruah tui tla a tam thar leh avangin Chakpi lui chu nasa takin a lian tih an sawi a, lei eng emaw zat a tichhia a ni. Kum 2015 khan Chakpi lui lian hian lei eng emaw zat a lo len chhe tawh bawk a ni. Lei chhia avang hian inkalpawhna pawh a buai nghal a, khaw eng emaw zat chu tlawh pawh theih loin an awm.

State sorkar chuan tuilian tuarte chhawm­dawl hna hi chhun zan zawma thawh a nih tur thu a puang a, harsatna tawkte chu a theih anga chhawmdawl zel an nih tur thu a sawi a ni.