Tripura sorkarin mipuite fimkhur turin chah

Tripura sorkar chuan an state-a tribal party pahnihte inkarah buaina a chhuah avangin mipuite chu fimkhur turin a chah.

Tripura-ah hian Thawhlehni khan tribal party pahnih, Indigenous People’s Front of Tripura (IPFT) leh Tripura Rajaer Ganamukti Parishad (TRUGP)-te inkarah buaina a chhuak a, tharum thawhna thlengah journalist Santanu Bhowmik chuan nunna chanin, midang 60 velin hliam an tuar bawk. He thil thleng avang hian satte sorkar chuan mipuite chu fimkhur tura chahin, venhimna pawh khauh zawka kenkawh a nih thu a tarlang. Buina nasat na hmun West Tripura leh Khowai district-a hmun 10 zetah Code of Criminal Procedure (CrPC) Section 144 puan a ni.

Tribal party-te inkara buaina chhuak avang hian Chief Minister Manik Sarkar chuan Ningani khan high level review meeting a ko a, Assam Rifles, Border Security Force, Tripura State Rifles leh Tripura Police offial-te an tel a ni. Meeting-ah hian venhimna khauh zawka kenkawh dan tur te sawiho a ni a, mipuite himna turin chak zawka hma lak an remti a ni. Chief minister chuan Director General of Police Akhil Kumar Shukla chu chhun zan zawma boruak thlithlai turin a hriattir a, buaina chinfel thuai a nih theih nan hma la turin a ngen bawk.

West Tripura District Magistrate Milind Ramteke, Inspector General of Police (law and order) K.V. Sreejesh, Deputy Inspector General of police Arindam Nath leh West District Police chief Abhijit Saptarshi-te chuan buaina chhuahna hmun hrang hrangte an tlawh kual tawh bawk.

Tarlan dan chuan Indigenous People’s Front of Tripura (IPFT)-te chuan Nilaini khan buaina an chawk chhuak leh a, security force-te an beih bakah, chenna-in, lirthei leh thildang eng emaw zat an tichhe leh a ni. Buaina punlunna Mandai-ah chuan venhim hna thawktu tam zawk tirh luh belh an ni bawk. IPFT-te hian hian Thawhlehni khan Communist Party of India-Marxist (CPI-M) tribal wing Tripura Rajya Upajati Ganamukti Parishad (TRUGP)-te kawngzawh chu lo tibuaiin, buina hi a darh zel a ni. Buina chhuak avang hian mi 60 velin hliam an ntuar a, an zingah hian hmeichhia leh police eng emaw zat an tel a ni. Deputy Inspector General of police Arindam Nath chuan he thil thlenga inhnamhnawiha puh IPFT activist 11 an man tawh tih a sawi.

Tripura-a rorel lai Communist Party of India-Marxist (CPI-M) chuan IPFT-te chetdan duh lohna lantir hian Ningani khan darkar 12 awh bandh an huaihawt. Bnadh huaihawt ni hian journalist 100 vel zet chu journalist nunna chan ta, Shantanu Bhowmik-a thlavang hauhin an pungkhawm a, an chenna in kawtah mi tam tak an pungkhawm bawk.

Tripura-ah hian IPFT leh Twipraland State Party-te chuan kum 2009 aṭang khan Tripura Tribal Areas Autonomous District Council (TTAADC) tih len duh lohna lantirin lungawi lohna an lo lantir tawh a, hei hi tun hnai khan an thar thawh leh a ni. IPFT-te hian July thla khan National Highway-8 bakah, rel kawng te chu ni 10 chuang an lo dang chat tawh a ni. TTAADC area hian Tripura state zau zawng hmun thuma ṭhena hmun hnih lai a huam a, tribal mi 12,16,000 vel an cheng a ni.

Hetih lai hian IPFT-te hmaljna hi rorel lai CPI-M, Congress party leh Bharatiya Janata Party bakh, tribal party-te chuan an thlawp lo a, hei vang hian buaina hi a chhuak fo a ni.