Journalist Santanu Bhowmik Thlavang hauhtu an tam

Tripura-a jourlalist pakhat Santanu Bhowmik chuan Indigenous People’s Front of Tripura (IPFT) leh Tripura Rajaer Ganamukti Parishad (TRUGP)-te inkara buaina chhuakah vanduaina tawkin nunna a chan a, a thlavang hauhtu an ṭhahnem hle.

Journalsit Bhowmik (28) hi buaina chhuahna hmun Mandai-ah a kal a, mi tu tih hriat lohten lo ru boin, a hnuah hliam na tak tuarin hmuh a ni a, Hospital panpui a nih hnuah a thi zui a ni. A thihdan hi chhui zui mek a ni. He thil thleng hi Arunachal Press Club (APC), Arunachal Pradesh Union of Working Journalists (APUWJ) leh Arunachal Electronic Media Association (AEMA)-te chuan an dem thu sawiin, Indigenous People’s Front of Tripura (IPFT)-te chu mawhphurtuah an puh.

APC, APUWJ leh AEMA-te chuan Bhowmik chunga thil theng hi an hrethiam lo takzet tih an sawi a, freedom of press bawhchhiatna a nih avangin he thil hi chhuichiang a, thil sual titute chu hrem ngei an nih theih nana chak taka hma lak an phut thu an sawi. Tripura Journalists’ Union (TJU) pawhin he thil thleng hi an dem thu an sawi a, hetianga rawng taka chetna hi a thlen tawh lohna tur leh, pawikhawihtute dan anga hremna pek an nih theih nana hma lak an phut thu an sawi. TJU chuan Chief Minister Manik Sarkar-a kaihhruai sorkar chu journalist-te himna tur ngaihtuah a, hma la turin an phut thu an sawi a, thi chhungte hnenah zángnadawmna pe turin an phut bawk.

Manipur khawpui Imphal-ah pawh Tripura journalist thah duh lohna lantir hian Manipur Press Club buatsaihin sit-in-protest neih a ni a, Santanu Bhowmik thlavang hauhna thuziak te an keng lang a ni. Manipur Press Club chuan thuchhuah siamin inthahna thleng an dem thu an sawi a, he thila mawhphurtute chu na taka hrem an phut thu leh, journalist-te laka rawng taka chetna a thlen tawh lohna turin venhimna ṭha zawk pek an phut thu an sawi. Bhowmik-a chhungte an tawrhpui thu an tarlang bawk.

Hriat theih chinah police-te chuan he thil thlenga inhnamhnawiha rinhlelh, Indigenous People’s Front of Tripura (IPFT) mi leh sa pali man an ni tawh a, thu zawhfiah mek an ni. Superintendent of Police (SP) Avijit Saptarshi chuan heng mi pali te hi Nilaini khan man an nih thu sawiin, thil thlen dan kimchang chhui zui mek a ni, a ti. SP chuan police duty zinga mi 16 zet chuan hliam an tuar tih a sawi bawk a, IPFT-te chetdan chu uchuak a tih thu a sawi. Police-te chu hmanraw remchang ang ang hmanga beih an nih thu sawiin, hliam tuar pawh an tam phah a ni, a ti.

Journalist Santanu Bhowmick hi ‘Dinrat’ television news channel-a thawk lai niin, West Tripura district, Mandai-a buaina chhuak cover tura a kal chu mi tu tih hriat lohten ruboin, kut an thlak zui a ni. Mandai aṭang hian Agartala Medical College and Hospital panpui ni mah se, a nunna chhan hman a ni lo. He thil thlengah hian IPFT party activist-te chu mawhphurtuah ngaih an ni. Buain chhuak avang hian hmun eng emaw zatah punkhawm khapna thupek tichhuah nghal a ni a, state pumah internet service tihtawp nghal a ni bawk.

Kumin chhungin ram chhungah jounalist mi pasarih thah an ni tawh a, chung zingah chuan Bengaluru-a journalist lar tak Gauri Lankesh (55) pawh a tel a, September 5 khan a in kawtah kahhlum a ni.