Tripura : Bhowmik-a thih dan report thehlut turin hriattir
Press Council of India (PCI) chuan Tripura-a journalist pakhat, Santanu Bhowmik (28)-a thah a nih dan report thehlut turin state sorkar a hriattir. Hetih lai hian pawl hrang hrangte chuan he thil thleng hi Central Bureau of Investigation (CBI) chhui tir an phut thu an lo auchhauhpui bawk.
Journalist Bhowmik hi kar kalta Nilaini khan West Tripura district-a Mandai-ah hliam na tak tuara hmuh a ni a, Hospital panpui a nih hnuah a boral zui a ni. A thihdan dik tak hi hriat chhuah a la ni lo a, chhui zui mek a ni. PCI chuan hemi chungchangah hian state sorkar chu report thehlut turin a hriattir ta a ni. Tripura Journalists Union (TJU) general secretary Pranab Sarkar chuan Bhowmik-a thihdan hi state sorkar chuan a chhui mek tih sawiin, report hi PCI chuan a nghak mek a, hemi hnu hian a thihdan dik tak hi puan theih beisei a ni, a ti.
West Tripura leh Khowai district-ahte Thawhlehni khan tribal party pahnih - Tripura Rajya Upajati Ganamukti Parishad (TRUGP) leh Indigenous People’s Front of Tripura (IPFT)-te inkarah buaina nasa tak a chhuak a, buaina chhuak avang hian mi eng emaw zatin hliam an tuar a ni. He thil thleng thlitlai tura kal journalist Bhowmik pawh rukbo a ni a, Nilaini khan hliam na tak tuara hmuh a ni. A hliam tuar loa a boral hnuah boruak a sosang zual a, venhimna pawh khauh zawka kalpui a ni.
Pawl hrang hrangte'n CBI chhuitir an phut
Pawl hrang hrangte chuan kar kalta Inrinni khan Santanu Bhowmik-a thah a nih duh lohna lantirin kawngzawh an huaihawt a, a thihdan hi Central Bureau of Investigation (CBI) chhuitir ngei an phut thu an sawi. Tripura Newspaper Society president Subal Kumar Dey chuan, Bhowmik-a chunga thil thleng chu an dem takzet thu sawiin, a kalsan tak a chhungte an tawrhpui tih a sawi. State sorkar chu journalist-te himna ngaipawimawh leh zual tura an phut thu sawiin, tun hnuah hetiang thil hi a thlen tawh lohna tura hmalak an phut thu an sawi. Kawngzawh huaihawtah hian pawl hrang hrang aiawhte chuan thu an sawi a, Bhowmik-a chunga thil thleng an dem thu an auchhuahpui bakah, state sorkar chu mawhphurtute zawnchhuah ngei an nih theih nana CBI kuta hlan tura an phut thu te an sawi a ni.
Driver pakhat chin hriat lohin awm
Police-te chuan kar kalta Ningani vek aṭang khan, kum 29 mi driver pakhat chu chin hriat lohin a bo tih an sawi a, chhui zui mek a nih thu an sawi. Police leh security force ṭangkawp te chuan driver chanchin hi an ngaihven zui mek a, rinhlelh man an la awm lo. Delhi aṭanga Tripura-a kal journalist pakhat chuan driver pakhat hruaiin, Khumulwng an pan a, an kalkawngh hian Indigenous People’s Front of Tripura activsit-te chuan lo beiin, an lirthei pawh an hal sak niin Police-te chuan an sawi. Driver hi tualchhung mi a ni a, a tuk aṭangin a chanchin hriat zui tur a awm lo a ni. Police-te chuan Tripura Tribal Areas Autonomous District Council (TTAADC) headquarters awmna Khumulwng hi an pan nghal a, IPFT activist-te chuan police-te pawh hi lo beiin, an lirthei te pawh an hal sak a ni.
Internet leh SMS service titawp
Tribal party pahnih inkara buaina chhuak hi a punlun zel lohna tur leh, thudik tawk lo thehdarh a nih lohna turin internet service tihtawp nghal a ni a, SMS Service pawh tihtawp nghal a ni bawk. Service provider-te chu an service titawp lailawk tur hian hriattir nghal an ni a, hei hi mipuite himna tur leh boruak sosang zel tur venna pakhat a nih thu sorkar chuan a tarlang. Information Minister Bhanu Lal Saha chuan thupek chhuah leh a nih hma loh chuan kalpui tur a nih thu sawiin, boruak awmdan an thlithlai reng thu a sawi. State home secretary Rakesh Sharwal chuan mipuite himna chu an ngaih pawimawh ber a nih thu sawiin, kawng hrang hrangin hma lak a nih thu a sawi. Hetih rual hian mipuite chu chiai lo tura a duh thu sawiin, buaina hi chinfel thuai tuma hmalak mek a ni, a ti.
Hetih lai hian eptu lam chuan rorel lai Communist Party of India - Marxist (CPI-M) chu dan leh thupek kengkawh ṭha tawk loah puhin, internert leh SMS service tihtawp a ni chu an hriatthiam loh thu an sawi. Puja hmang tura mipuite an inbuatsaih lai a nih avangin service tihtawp hian mi tam tak tan harsatna a thlen a, air leh railway ticket booking thlenga harsatna a thlen avangin tihtawp an phut thu an sawi. Service tihtawp chu buaina chinfelna ṭha ber a ni lo tih sawiin, dan leh thupek khauh taka kengkawh zawk tur leh, buaina punlunna hmunah te venhim hna thawktu tam zawk dah lut turin sorkar an phut a ni.
BJP state president Biplab Kumar Deb chuan chief minister Manik Sarkar-a kaihhruai sorkar chu dan leh thu pek kenkawh kawnga hlawhchhamah puhin, sut thuai turin a phut tih a sawi. Tripura News Correspondents’ Forum (TNCF) general secretary Nabendu Bhattacharjee pawhin internet leh SMS service tihtawp a ni chu a dem thu a sawi a, a tuartu nasa bertu chu journalist-te tho an nih avangin hlih an phut thu a sawi ve bawk. Pathianni zan thleng khan internet service hi tihtawp a la ni.
CPI-M tribal wing Tripura Rajya Upajati Ganamukti Parishad (TRUGP) leh People’s Front of Tripura (IPFT)-te inkara buaina chhuak avang hian mi 60 velin hiam an tuar a, an zingah hian police pwh eng emaw zat an tel a ni. Deputy Inspector General of police Arindam Nath chuan he thil thlenga inhnamhnawih IPFT member 13 man an nih tawh thu a sawi a, thu zawhfiah mek an ni, a ti. Tripura-ah hian IPFT-te hian Tripura Tribal Areas Autonomous District Council (TTAADC) tihlen leh tihchangtlun duh lohna hi an lo lantir fo tawh a, tun ṭumah pawh hian state sorkar hmalakna duh loin buaina hi an chawkchhuak a ni.