Medical seat row : SC-in MBBS Seat pe turin Assam sorkar hriattir

Supreme Court (SC) chuan Meghalaya state quota-a Assam-a MBBS zirturte chu admission pe vek turin Assam sorkar a hriatttir.

Meghalaya-a zirlai 10-te chu state quota-a MBBS zirturin an tling a, hetih lai hian Assam sorkar chuan heng zirlaite hi admission a pe lo nia tarlan a ni. Hemi chungchangah hian state pahnih chief minister-te pawh an lo indawr tawh a, Meghalaya sorkar chu heng zirlaite hnena admission pek a nih ngei theih nan hian Supreme Court-ah hian a zualko bawk. Pathianni khan SC chuan thuchhuah hi siamin, heng zirlaite hi admission pe ngei turin Assam sorkar a hriattir ta a ni.

Sorkar official chuan, "SC thupek angin, Meghalaya state quota-a MBBS zir tura tlingte chu admission ti turin Assam-a medical college hrang hrangah tirh an ni leh tawh a ni" a ti. MBBS zir tura inziak tlingte hi National Eligibility and Entrance Test (NEET) paltlang vek an ni a, nimin vek khan admission hi an ti nghal tura ngaih a ni. SC chuan kar kalta Zirtawpni khan Meghalaya state quota-a MBBS zir thei tura inziak tlingte chu seat pek ngei an nih tur thu a lo tarlang tawh bawk a ni.

Apex court chuan hemi chung­changah hian interim order a lo tichhuak tawh bawk a, Assam leh Meghalaya sorkar te chu inbiakna nei tur leh, NEET qualify candidate-te seat pe turin inremna siam turin a hriattir a ni. Inbiakna hi thupek chhuah aṭanga ni 10 ral hmaa nei turin a ti bawk.

SC-in thupek a chhuah hnu hian Meghalaya Health and Family Welfare Minister, Roshan Wajri chuan zirlai nu leh pate chu meeting a neihpui nghal a, admission chungchang a sawipui. Tarlan dan chuan Guwa­hati Medical College leh Assam Medical College-ahte zirlai pali ve ve seat pek an ni ang a, Silchar Medical College-ah seat pahnih ruahman a ni bawk.

Assam-a medical collge hrang hrangah hian Meghalaya state quota-a MBBS zir turte chuan admission an tih dawnah harsatna an tawk a, college thuneitute chuan seat a full tawh thu leh, admission an pek theih tawh lo thu an lo hrilh nia tarlan a ni. He thil thleng avang hian Meghlaya Chief Minister Mukul Sangma chuan Assam Chief Minister Sarbananda Sonowal pawh a be pawp nghal a, an zirlaite harsatna tawh chu chinfel thuai a nih theih nana hma lakpui turin a ngen. Sonowal chuan heng zirlaite chunga harsatna thleng hi pawi a tih thu leh, thil awmdan chhui chian a nih tur thu a lo hrilh a ni. Hemi chungchang hi Supreme Court-te chuan an ngaihtuah a, seat pek an nih anga admission pe turin state sorkar leh, Guwahati Medical College, Assam Medical College bakah Silchar Medical College-te chu hriattirna a pe ta a ni.