Manipur-a Meitei-te'n Scheduled Tribe list-a tel phut
Manipur-a Meitei-te chuan Scheduled Tribe list-a tel an phut thu an sawi a, hemi a hlawhtlin theih nan hian state sorkar chu chak zawka hma la tura an phut thu an sawi.
Scheduled Tribe Demand Committee, Manipur (STDCM) chuan tun hnai khan Imphal-ah vantlang inkhawm an buatsaih a, he hunah hian Scheduled Tribe list-ah telh an nih theih nana chak zawka hma lak an rel a ni. STDCM-te chuan tlang mite ST status pek an nih laia list-ah telh an ni ve lo chu an pawi an tih thu an sawi. Manipur leilung fate an nih ang ngei a, ST list-ah tel an phut thu sawiin, chu chu ram danpui pawhin a phut tih an tarlang. Hemi chungchangah hian November 30, 2012 khan state Governor hnenah memorandum an lo thehluh tawh tih sawiin, chief minister hnenah pawh December 18, 2012 khan an thehlut bawk tih an sawi.
Ministry of Tribal Affairs chuan Meite-te ST list-a telh an nih leh nih loh tur chungchangah hian May 29, 2013 khan Manipur sorkar chu hriattirna a lo pe tawh a, list-ah tel an nih theihna tura pawmpuina thehlut turin a lo hriatir tawh a ni. Ministry chuan state sorkar chu Meitei-te ethnographic leh socio economic survey report-te thehlut turin a tibawk. Hemi chungchang hi June 29, 2015-a Manipur Assembly budget session-ah sawiho a lo ni tawh a, Chief Minister O Ibobi-a kaihhruai sorkart chuan mithiamte zirchian turin a dah a ni. Mahse report hi tun thlengin peih a la ni lo niin, STDCM-te chuan an sawi.
Hemi chungchang vek hi August 2, 2017-a Legislative Assembly budget session-ah khan sawiho leh a ni a, Chief Minister N Biren chuan Manipur State Commission for Scheduled Tribes-te zirchian turin dah a nih thu a sawi. Hetih lai hian STDCM-te chuan kum li chhung zet Committee-in an zirchian hnuah pawh report hi tihchhuah a la ni lo tih sawiin, chak zawka hma lak an phut thu an sawi a ni.