Assam : NHPC project guard wall chim vangin lungawi lohna lantir

National Hydro Electric Power Corporation (NHPC) hydro-power project thawh meka powerhouse guard wall chu tuilianin a tichhe ṭhen a, leitawlhin tunnel a tichhe tel bawk. He chhiatna thleng chungchangah, mithiamte ngaihdan ngai pawimawh loa dam hi siam luih a nih avangin mipuiten Thawhlehni khan lungawilohna an lantir a ni.

Krishak Mukti Sangram Samiti (KMSS) chuan Guwahati-ah lungawi lohna lantirin, All Assam Students' Union (AASU) chuan Lakhimpur-ah nawrh an huaihawt bawk. Pawl pahnihte chuan mithiamten mega dam siam hi a him tawk lo nia ngaia a hmaa an lo sawichhuak tawh chungin PSU, sorkar laipui leh state sorkar chuan an siam lui nia sawiin, an dem thu an sawi.

Assam-Arunachal Pradesh border-a Gerukamukh-a mega-dam siam hi a hma aṭangin an lo dodal tawh a, tun hnaia chhiatna thleng hian project siamna hnuai lama chengte tan a him loh zia a rawn tilang chiang a ni, an ti.

Pathianni zan khan ruahsur nasa avanga Subansiri lui lianin 2,000 MW Subansiri hydro project-a powerhouse temporary guard ṭhenkhat chu a tichhia a ni.

Tualchhung mi leh pawl hrang hrangten lui mawng lama chengte tana a him dawn lo nia sawi mega dam siam tum hi an dodal avangin kum 2011, December aṭanga kum 2019, October thla thleng khan hnathawh hi tihtawp lailawk a lo ni tawh a ni. NHPC chuan kum August, 2023-ah project hi zawhfel tum a ni tih an website-ah an tarlang.