Nagaland-a Ad-hoc teacher-te'n dah ngheh phutin nawrh huaihawt

All Nagaland Ad-hoc Teachers Group (ANAT G) 2015 batch-a ad-hoc zirtirtu 1,166-te chuan an hnaa dah ngheh phutin Thawhṭanni aṭang khan tiam chin awm loin nawrh an huaihawt.

ANAT-G hian Kohima-a Secretariat kawtah nawrh an huaihawt a, hetih lai hian state sorkar chuan Gauhati High Court in contract/ad-hoc basis-a kum thum an thawh tlin vang ringawta dah nghet mai lo tura thupek a lo tihchhuah tawh sût a nih phawt loh chuan, an thil phut hi cabinet-in a ngaihtuah thei rih lo niin a sawi thung.

School education principal director Thavaseelan chuan ad-hoc teacher-te dahnghehna tur Personnel & Administrative Reforms (P&AR) department-ah pawh thlen tawhin, cabinet pawhin vawi tam tak a ngaihtuah tawh a, mahse High Court chuan office memorandum hi a pawm loh avangin court remtihpuina lo chuan dah ngheh tumna hi kalpui theih a ni rih lo a ni, a ti.