Economy hmasawnnan tourism sector kan ngai pawimawh dawn: Manipur CM

Manipur chief minister N Biren Singh chuan an state economy hmasawnna tur chu tourism sector-ah a innghat lian hle tih sawiin, a kaihhruai sorkar chuan a ngai pawimawh chho zel dawn tih a sawi.

Thawhlehnia Nambol Bishnupur district-a Maibam Lotpa Ching-a World Tourism Day hmannaah CM chuan thu sawiin, sorkar chuan khualzin tam zawk hip luhna turin tourist circuit pawh a siam belh zel tih a sawi. Tourist spot hrang hrang siamin,Sangai Ethnic Park, Marjing-ah feet 120-a sang Sagol Kangjei lim, Makhel-ah Heritage site, Rani Gaidinliu Museum, Behiang-ah Cultural Centre leh hmun eng emaw zatah Amusement park-te siam a ni, a ti.

Kangkhui cave leh Tharon cave pawh tlawh theih tura hawn thuai a ni dawn a, hei bakah hian Tata Group nena thawkdunin Old High Court Complex-ah 5-star hotel sak mek a ni tih a sawi bawk. Tourism sector tihchangtlunna atan kum nga liam ta chhung khan sorkar chuan boruak leh khawmual lama inkalpawhna ṭha siam turin kawng hrang hrangin hma a la a ni, tiin CM chuan a sawi.