Colour-blind student hnenah MBBS admission pe turin ti

Supreme Court (SC) chuan Tripura-a zirlai pahnih, colour-blind-te chu session thar atan MBBS admission pe turin a ti.

SC chuan colour-blind zirlai pahnihte hian Tripura sorkarin pre-NEET entrance exam a buatsaihah mark an hmu sang ber tih sawiin, ram danpui Article 142 hnuaiah Colour Vision Deficiency (CVD)-te chu special quaota pek tur an ni a, MBBS an zir theihna turin admission pek an nih tur thu a tarlang. Medical Council of India (MCI) hnuaiah emaw Tripura Medical College-ah emaw admission an ti thei dawn a ni. Chief Justice Dipak Misra chuan, "Colour-blind student pahnihte hian 2018-2019 session aṭangin MBBS course an zir thei dawn a, special quaota pek an ni" a ti.

Justices Amitava Roy leh A M Khanwilkar-te pawhin heng zirlai pahnihte hi ram danpuiin Article 142 hnuaiah special quoata pek an nih thu an sawi ve bawk.

July 31 khan zirlai pahnihte hi MBBS an zir ve theihna turin Tripura High Court-ah an zualko a, mahse court chuan hamṭhatna pek theih an nih bik loh thu a hriattir. Court thupekah an lungawi loh vang hian apex court-ah an zualko leh a, mahse MCI chuan colour-blind student tan special quoata a nei lo nia tarlan a ni. Colour-blind student-te doctor an nih ve theihna tura kawng hawn sak tur hian, Apex court chuan March 23 khan experts committee a din a, hetah hian AIIMS, Post Graduate Institute of Medical Education and Research (PGIMER), Chandigarh offcial bakah, senior advocate K V Vishwanathan leh advocate Shoeb Alam te chu member an ni.

Zirlaite harsatna hi hun eng emaw chen hnuah chinfel a ni ta a, Supreme Court chuan admission pek an nih tur thu a tarlang ta a ni.