Tripura journalist thih dan SIT-in chhui dawn

Tripura sorkar chuan journalist Santanu Bhow­mik-a thih dan chu Special Investigation Team (SIT) chhui tir an nih tur thu Thawhlehni khan a puang a, Bhowmik-a chhungte hnenah zángnadawmna cheng nuai 10 pek a remti bawk.

Information and Finance Minister Bhanulal Saha chuan journalist Bhowmik-a thihnaa mawhphurtute chu zawnchhuah ngei an nih theih nan SIT kutah hlan a ni dawn tih sawiin, senior IPS officer kaihhruaina hnuaiah a chhui hna hi thawh a nih tur thu a tarlang. Hetih rual hian Bhowmik-a chhungte chu state sorkar chuan a tawrhpui takzet tih sawiin, a kalsan tak a chhungte hnenah hian zángnadawmna cheng nuai 10 pek cabinet chuan a remti tih a sawi. Press Council of India (PCI) chuan he thil thleng thlithlai tur hian team a tirlut tawh tih a sawi bawk.

Chief Minister Manik Sarkar-a kaihhruaiin Thawhlehni khan Cabinet Meeting neih a ni. Cabinet chuan SIT kuta hlan hi a remtih bakah, Bhowmik-a nu chu sorkar hna pek a ni dawn bawk. Finance Minister Bhanulal Saha chuan, Bhowmik-a farnu chuan lehkha a la zir mek avangin sorkar hna pek a rem lo a, hei vang hian a nu hnenah sorkar hna hi pek a nih tur thu a sawi. Hetih lai hian pawl hrang hrangte chuan he thil thleng hi Central Bureau of Investigation (CBI) chhui tir an phut thu an sawi a, hei hi opposition party Bharatiya Janata Party leh Congress pawhin an thlawp thu an sawi.

Deputy Inspector General of Police (Southern Range) Arindam Nath chuan journalist thahnaa mawhphurtu bera puh Sachin Debbarma chu man a nih tawh thu a sawi. Sachin hi hel pawl National Liberation Front of Tripura (NLFT) mi leh sa a ni a, tribal party Indigenous People’s Front of Tripura (IPFT)-ah member a ni bawk. Tun hnaia APFT-te'n hmun hrang hranga buaina an chawhchhuahah khan a phusa ber pawl nia sawi a ni a, Mandai-a Bhowmik-a rukbo leh thahnaah khan mawhphurtu berah ngaih a ni.

Buaina chhuah nasatna hmun West Tripura leh Khowai district-ahte chuan nunphung a pangngai chho ṭan a, hetih rual hian venhimna chu khauh taka kenkawh a la ni. September 19-a buaina a chhuah aṭanga chin hriat loha awm, driver Jiban Debnath (29) chu tun thlengin a chin hriat a la ni lo. Jiban hi Delhi aṭanga Tripur-a kal, journalist pakhat-in a hmang a, Khumulwng pana an kal laiin APFT-te'n lo beiin a lirthei te pawh an halsak nia sawi a ni a, September 20 aṭang khan chin hriat lohin a bo zui ta a ni. A zawn hna hi thawh reng a la ni a, mahse tun thlengin a chin hriat ala ni lo.

Tripura-ah hian rorellai Communist Party of India - Marxist (CPI-M) tribal wing, Tripura Rajaer Upajati Ganamukti Parishad (TRUGP) leh Indigenous People’s Front of Tripura (IPFT)-te inkarah September 19 khan buaina a chhuak a, local television channel-a thawk lai journalist Shantanu Bhowmik (28) chu rukbo a nih hnuah hliam na tak tuara hmuh a ni. A ni bakah hian midang 60 velin hliam an tuar. Bhowmik hian hliam na tak a tuar a, Govind Ballabh Pant Medical College and Hospital panpui a nih hnuah a hliam tuar loin a thi zui a ni. He thil thleng hian dem a hlawh hle a, Bhowmik-a thlavang hauhtu pawh an ṭhahnem hle.

Buaina chhuak avang hian West Tripura leh Khowai district-ahte mipui punkhawm khapna thupek tihchhuah a lo ni tawh a, internet leh SMS service-te pawh tihtawp lailawk a ni. State sorkar chuan tribal party pahnihte inkarah buaina chhuak avang hian mipuite chu fimkhur turin a lo chah tawh bawk. Chief Minister Manik Sarkar chuan hemi chungchang ngaihtuah hian high level review meeting koin, Assam Rifles, Border Security Force, Tripura State Rifles leh Tripura Police official-te nen venhimna khauh zawka kenkawh dan tur an sawiho a ni. Rorel lai Communist Party of India-Marxist (CPI-M) chuan IPFT-te chetdan duh lohna lantir hian darkar 12 awh bandh an lo huaihawt tawh bawk.

Tripura-ah hian IPFT leh Twipraland State Party-te chuan Tripura Tribal Areas Autonomous District Council (TTAADC) tih len duh lohna lantirin lungawi lohna an lo lantir fo tawh a, tun ṭuma an buaina pawh hi TTAADC chungchanga state sorkar hma lak dan an duhkhawp loh avang nia ngaih a ni. TTAADC area hian Tripura state zau zawng hmun thuma ṭhena hmun hnih lai a huam a, tribal mi 12,16,000 vel an cheng a ni.