Manipur-ah darkar 48 awh nawrh huaihawt

Manipur-ah Thawhṭanni zan lai aṭang khan darkar 48 awh general strike huaihawt a ni a, nun­phung a khaihlak phah hle.

Naga Chiefs Associa­tion leh Kuki Chiefs Asso­ciation-te chuan Ma­hat­ma Gandhi Natio­nal Rural Employ­ment Guarantee Scheme (MGNREGS) hnuaia ni 100 inhlawhna pek phutin nawrth hi an huaihawt a, 2016-17 chunga ni 17 inhlawhna sorkarin a la pek loh chu pekchhuah thuai an phut thu an sawi.

Tengnoupal Superin­tendent of Police S. Ibomcha chuan nawrh huaihawt hi mipuiten an thlawp ṭhat thu sawiin, sorkar office, zirna-in leh sumdawnna hmun te pawh khar a nih thu a sawi. Hei hian Manipur leh Myanmar inkalpawhna Trans Asian Highway-a lirthei che vel pawh a nghawng buai a, kawng lakah eng emaw zat an tangkhang a ni. Nawrh hian Myanmar ramri hnaia awm Moreh, Chandel, Tengnoupal, Machi leh Chakpikarong-ahte nghawng a nei nasa zual a, Naga leh Kuki lungawi lote chuan hmun tam takah tyre an hal a ni. An thil phut tihlawhtling thuai turin sorkar an phut thu an sawi a, hmalakna a awm lo a nih chuan na zawka hma lak an tum thu an sawi. Nawrh huaihawt hian India-Myanmar ramri-a sumdawnna a nghawng nasa hle nia tarlan a ni a, vaibelchhe eng maw zat hloh a ni.