Meghalaya Budget-a 15% chuang education tan dah a ni : CM Sangma

Meghalaya chief minister Conrad K Sangma chuan state budget aṭanga 15% chuang chu education atan dah a ni tih sawiin, a kaihhruai sorkar chuan zirna changtlung leh ṭha zawk siam turin hma a la zel dawn tih a sawi.

Chief Minister chuan, "Education sector hi sorkarin kan ngaih pawimawh leh, chona tamna sector a ni. Chona hrang hrang awmte kan hmachhawn zel a, education policy kalpui, sorkar school building sak, college thar hawnte bakah, private school leh college-te tan pawh infrastructure kan pe a ni," a ti.

Meghalaya budget, Rs vbc 16,000 aṭangin Rs vbc 2,500 chuang chu kumtin school leh college enkawlna atan leh, infrastructure investment atan hman ṭhin a ni, tiin CM chuan a sawi.

Meghalaya sorkar chuan hmalakna hrang hrang hmangin rural area-a higher education tihchangtlun dan kan ngaihtuah a, zirlai pung zel dawl zo turin higher educational institute-te tihlen a nih bakah, infrastructure tharte siam a ni, a ti.