Sikkim CM-in ASHA worker hlawh a tipung

Sikkim chief minister Prem Singh Tamang chuan October thla aṭanga hman ṭan turin an state-a Accredited Social Health Activist (ASHA) worker-te hlawh chu 60% chuangin a tipung.

ASHA worker-te hian thla khatah Rs 6,000 an hlawh a, thla thar aṭang chuan Rs 10,000-ah a pung tawh dawn a ni.

Sikkim-ah hian ASHA worker 700 vel an awm mek a ni.

Nilainia Manan Kendra, Gangtok-a appointment order distribution programme a hmannaah CM chuan he thu hi a puang a ni. Mi 2,000 hnenah appointment order hi a sem nghal a ni. Hna thawk tura lak tharte chuan taima takin, an state hmasawnna atan leh mipuite tana thawk tura an beisei thu a sawi.

ASHA hi ministry of health and family welfare (MoHFW) in National Rural Helath Mission (NHRM) a kalpuina hnuaia community health worker atana a chhawrte an ni. He mission hi kum 2005 aṭang khan kalpui ṭan a ni. ASHA worker-te hi hmeichhia niin, an awmna khawtlangah health educator leh health promoter anga thawk tura zirtir an ni a, ram chhunga thingtlang khaw tinah ASHA worker dah hi mission-in a tum a ni tel bawk. Thingtlang mite hriselna lam kawnga zirtirna an pek ṭhat leh, an hnathawh ṭhat vangin kumina WHO Director-General Global Health Leaders award dawngtu paruk zingah ASHA hi thlan niin, May 22 khan World Health Assembly vawi 75-na opening session-ah award hi hlan an ni.