Indian Army-te'n Indo-Myanmar Border-ah Surgical Strike an nei

Indian Army Eastern Command chuan Nilaini khan Indo-Myanmar Border-ah Naga hel, National Socialist Council of Nagaland - Khaplang (NSCN-K)-te lakah Surgical Strike neih a nih thu a sawi a, mahse sipaite hian international border an pel lo niin a sawi.

India-Myanmar border-a Surgical Strike neihah hian sipaite leh NSCN-K mi leh sa te chu hun eng emaw chen an inkap a, hel eng emaw zatin hliam an tuar a, thi erawh an awm hriat a ni lo. Eastern Air Command chuan hel laka beihpui thlakah hian sipai zingah hliam tuar an awm lo tih sawiin, media-a hliam tuar awm anga tarlan chu thu belhchian dawl lo a nih thu a sawi.

Indian Army-te hian August thla pawh khan Arunachal Pardesh-a Indo-Myanmar border-ah NSCN-K dapchhuah beihpui an lo thlak tawh a, hel awmna camp eng emaw zat tihchhiat a nih bakah, AK-47 rifle, radio, leh silai mu ṭhahnem tak an la man tawh bawk a ni. Official-te chuan Naga hel NSCN-K te lakah hian beihpui thlak chhunzawm zel a nih tur thu an sawi. NSCN-K hi hmarchhaka hel pawl lian leh rawra ber zinga mi an ni a, September 1 pawh khan Arunachal Pradesh-a Kunnu khuaah civil mi an lo that tawh a ni. NSCN-K te hian kum 2015 khan Manipur-ah Indian Army-te an lambun a, hemi ṭum hian sipai 18 zet an thi a ni. He thil thlen hnu hian NSCN-K te lakah hian beihpui thlak a lo ni fo tawh a ni.

NSCN-K te hi Myanmar ram chhungah an bihruk ṭhin avangin duh angin hma lak a harsat thu tarlan a ni. Hetih lai hian Special Force-te chuan Myanmar ramchhunga an camp eng emaw zat chu an lo tihchiat sak tawh bawk.