Journalist Murder Case chinfel thuai a ni dawn : Tripura DGP

Tripura Director Gerenal of Police (DGP) Akhil Kumar Shukla chuan journalist Santanu Bhowmik-a thahna thubuai kalmek chu chinfel thuai a ni dawn tih a sawi.

DGP Akhil Kumar Shukla chuan he thu hi thuthar theh­darutte hmaah sawiin, he thila inhnamhnawiha puh mi pathum te chu man an nih tawh thu a sawi. Heng mite inpuanna aṭang hian journalist thahnaah hian mi 10 aṭanga 12 vel an inhnamhnawih niin a sawi a, hun reiloteah chinfel theih an inbeisei tih a sawi. Hetih lai hian police-te chuan Bhowmik-a mobile phone chu an la hmu let lo tih sawiin, an hmuh leh hunah chuan an thil chhui kawngah nasa taka a puih theih an beisei thu a sawi.

State sorkar chuan tribal party pahnih - Tripura Rajaer Upajati Ganamukti Parishad (TRUGP) leh Indigenous Peo­ple’s Front of Tripura (IPFT)-te inkara buaina chhuak avanga nunna chan journalist Santanu Bhowmik-a chhungte hnenah zángnadawmna cheng nuai 10 pek a nih tur thu leh, he thil thleng hi Special Investigation Team (SIT) chhui tir an nih tur thu Thawhlehni khan alo puang tawh a ni. Hetih lai hian pawl hrang hrangte chuan he thil thleng hi Central Bureau of Investigation (CBI) chhui tir an phut thu an sawi thung. September 19-a buaina chhuak avang hian mi 60 vel zetin hliam an tuar a, boruak a ralmuang lo hle a ni. Buaina chhuak avang hian hmun eng emaw zatah punkhawm khap a ni a, internet leh SMS service-te pawh tihtawp lailawk a lo ni tawh a ni.