Sorkar laipui-in Manipur-Myanmar Border-ah venhimna tikhauh

Sorkar laipui chuan Rohingya Muslim-te'n India ram an rawn luh lohna turin, Manipur-Myanmar Border-ah venhimna khauh zawka kenkawh a nih thu a tarlang.

India leh Myanmar inrina hi km km 1643 zet a ni a, Bangladesh nena a inrina pawh km 4096.7 zeta thui a ni. Hmarchhak state-te chu ṭhenawm ram te nen hian an inri hlawm avangin venhimna pawh khauh zawka kalpui a ni. Manipur sorkar chuan International Border-ah hian venhimna khauh zawka kalpui a nih thu a lo sawi tawh a, sorkar laipui chuan hei hi a rawn nemnghet ve leh a ni. Sorkar laipui chuan ramri-ahte hian chhun zan zawma venhimna kalpui a nih thu sawiin, security dinhmun hi thlithlai reng a nih thu a tarlang. Manipur-Myanmar Border chu Rohingya Muslim-te tana India rama rawn luhna remchang a nih avangin, venhimna pawh khauh zawka kalpui a ni, a ti.

Sorkar laipui chuan security kalpui dan thlithlai tur hian, Joint Secretary (Northeast) Satyendra Garg leh Special Secretary (International Security) Rina Mitra-te chu a ruat a, Indo-Myanmarese Commer­cial Trade Centre leh Indo-Myanmar Friend­ship Bridge-te pawh hei hian a huam a ni. Joint Secretary Garg chuan ram dang

aṭanga India-a lo luh tumte dang tur hian Free Movement Regime din a nih thu a sawi a, hei hi Arunachal Pradesh, Nagaland, Manipur leh Mizo­ram-ahte kalpui mek a nih thu a sawi. Hetih rual hian ramria security check-post hrang hrangah thawktu dah belh a ṭul thu sawiin, check-post pawh siam belh zel a ngai tih a sawi.