Manipur sorkarin rialbanlote tan Special scheme kalpui dawn

Manipur Chief Minister N. Biren Singh chuan pianphunga rual­banlote tan special scheme duan a nih thu sawiin, hei hi October thla aṭang hian kalpui a nih tur thu a sawi.

CM Biren Singh chuan he thu hi Credit Linkage Programme of Manipur State Co-operative Bank Ltd. (MSCBL)-te prog­ramme buatsaih a hmanpuinnaah sawiin, rualbanlote hamṭhatna tur scheme a nih thu a sawi. He scheme hnuaiah hian soft loan siam a ni dawn a, sumdawnna lama bul an ṭanna tur te, anmahni an intunnunna tur kawng hrang hrang dapsak an ni dawn tih a sawi. Hemi tihlawhtling tur hian bank hrang hrangte chu thawhpuiah a sawm a, pawl hrang hrangte pawh thawhpuiah a sawm bawk.

Biren Singh chuan BJP kaihhruai sor­kar hmalaknate tar­lang­in, infrastructure tih­chang­tlun chu an ngaih­pawi­mawh hmasak a nih thu a sawi. Hetih rual hian ramdangte nena insumdawn tawnna chu hmasawnna atan thil pawimawh a nih thu sawiin, ṭhenawm ram South East Asia ram te nena inlaichinna ṭha zawk siam tura hma an lak mek thu a sawi. Mipuite chu state sorkar hmalakna te thlawp zel turin a fuih bawk.

Manipur CM chuan Novemver 21 aṭangin Sangai Festival hman ṭan a nih tur thu a sawi bawk a, Festival hawnna hun hi India President Ramnath Kovind pawhin a hmanpui dawn niin a sawi. Festival neih chhung hian ram dang ṭangin foreign investment ambassador pawh eng emaw zat tel tura sawm an nih thu leh, ram 15 aṭangin ambassador an tel theih beisei a ni, a ti. Retheihna umbo chu an tum bulpui ber a nih thu sawiin, hei hi Prime Minister Narendra Modi pawhin a thlawp thu a sawi.