New Delhi-ah Northeast Festival buatsaih leh dawn
North East Festival vawi nga-na chu New Delhi-a Indira Gandhi National Centre for the Arts (IGNCA)-ah November 3 khian neih a ni dawn.
North East Festival hi hmarchhak state hrang hrangte tradition leh culture pholanna atana hman ṭhin a ni a, kum 2013 ṭang khan hman ṭan a ni. New Delhi, Janpath-a IGNCA-ah Festival hi hman ṭhin a ni a, kuminah pawh hman leh tura ruahman a ni. He hunah hian hmarchhak state hrang hrangten an culture leh tradition phochhuahna hun an hmang dawn a, mipui hip thei turin programme pawh duan a ni. A buatsaihtute chuan hei hi India rama state dangten hmarchhak state hrang hrangte ziarang leh nunphung an hriat theih nana buatsaih ṭhin a nih thu an sawi.
Festival neih chhung hian hnam lam chi hrang hrang en tur a awm dawn a, Nagaland state aiawha telten Naga warrior dance an entir dawn a, Manipur-in Thang ta, Tripura-in Hojagiri, Meghalaya-in Wangala dance, Arunachal Pradesh-in Lion dance an entir ang a, Mizoram aṭanga tel te pawhin Cheraw an kan dawn a ni.
Festival neih chhung hian hmarchhak state hrang hrang aṭangin artist 150 vel ten an kutchhuak chi hrang hrang an phochhuak dawn bawk a, dawr 30 vel hawn a ni ang. Hei hi tourism lama hmasawnna tura hmalakna pakhat a ni a, khualzin tam zawk hip nan buatsaih a ni.
North East Festival (NEF) hmasa ber chu kum 2013 Noverber 8-9 chhung khan IGNCA-ah hian neih a lo ni tawh a, kumtin neih chhoh zel a ni ta a ni. Mipuiten an hlut avangin festival pawh hi a changtlung chho sawt hle a ni.