Kohima-ah total lockdown kalpui dawn Hri kai hmuh chhuah tam ber ni thleng

Nagaland khawpui, Kohima-ah Covid-19 kai an pun belh zel avangin vawiin aṭanga July 31 thleng khawpui huam chhung bikah total lockdown kalpui a ni dawn. Lockdown puan chhung hian damdawi leh nitin mamawh zawrhna dawrte chu zing dar 9 aṭanga chawhnu dar 2 thleng in hawn phalsak an ni dawn a, dawr dangte erawh hawn phal a ni lo ang. 

Dimapur-ah pawh July 26 aṭanga August 2 thlengin partial lock­down kalpui a ni bawk ang. Nagaland-ah hian Ningani khan hri kai hmuh chhuah tam ber ni thlengin, mi 90-in Covid-19 an kai tih hriat belh a ni. Hri kai hmuh thar zingah hian armed force mi leh sa 43 bakah frontline worker pakhat an tel. Quarantine centre-a awm lai mi 42 te leh, hri kai tawhte aṭanga kai chhawng mi pali an awm bawk. Ningania hri kai hmuh tharte nen Nagaland-a Covid-19 kai hmuh chhuah tawhte chu mi 1,174 an ni tawh. An zinga mi 530 chu enkawl dam ni tawhin, recovery rate hi 45% a ni a, enkawl mek mi 644 an la awm. Hri kai mek zinga mi 640 chu taksa lama harsatna nei lo, asymptomatic an ni.

Nagaland-ah hian RT-PCR khawl hmangin sample 20,126  test a ni tawh a, Truenat hmangin sample 13,497 test a ni tawh bawk.

Shillong-ah ni thum chhung lockdown puang Meghalaya khawpui, Shillong huam chhungah pawh Pathianni zan zanlai aṭangin July 29 zanlai thleng total lockdown puan a ni dawn. Nimina cabinet meeting-ah lockdown puan hi an 

rel a ni. Shillong Khasi Jaintia Church Leaders Forum (SKJCLF) huaihawtin Pathianni hian hripui leng mekah Pathian ṭanpuina dila chaw ngheia ṭawngṭaina hun buatsaih a ni dawn. Zing dar 6 aṭanga zan dar 6 chhung huamin, mipuite chu an remchan dan anga hemi chhunga hun hmang turin an ngen.