Manipur-ah travel history nei lo 12 in hri kai

Manipur-ah Ningani khan Covid-19 kai hmuh chhuah thar  mi 55 an awm leh a, an zinga mi 12 chu hmun danga zin chhuahna nei lo an ni. Hri kai hmuh chhuah tharte nen Manipur-a coronavirus kai hmuh chhuah tawh hi mi 2,115 an tling tawh a ni. An zinga mi 1,460 chu enkawl dam ni tawhin, hri kai mek hi 655 an la awm. 

Additional health director Dr K Sasheekumar Mangang chuan Ningania hri kai hmuh thar zinga mi 12, Thoubal district-a mite chu hmun danga zin chhuahna nei lo a, hri kai tawhte aṭanga an kai chhawn nia a lan thu a sawi. Hri kai thar zingah hian Leimakhong Garrison-a security force mi leh sa 12 an tel bawk. Hemi hma hian Kangkokpi distict-ah hian CRPF training centre-a sipai 63-te chuan hri an kai tih hmuh a lo ni tawh bawk. Ningani vek khan hri kai enkawl zinga mi 42 chu an dam tawh avangin enkawlna hmun aṭangin chhuah tir an ni. Recovery rate pawhin hma a sawn leh hret a, 69.03% a ni.