Assam-ah Coronavirus vangin police pathum thi tawh

Assam-ah Ningani khan police constable, Puni Mech Paul chu Covid-19 vangin a thi a, ani nen hian he hripui hi police pathumin an thihpui tawh a ni. 

ADGP( law & order) GP Singh chuan state police force zingah coronavirus kai hmuh chhuah hi 982 an awm tawh tih sawiin, an zinga 662 chu enkawl dam an ni tawh tih a sawi. Hri kai dam tawh zinga mi 90 chuan an hna an zawm leh tawh bawk. 

Assam sorkar chuan jail chhunga hri kai hmuh belh zel an nih avangin hri darh zel tur venna kawng khat atan, jail chhung tawt lutuk tihziaawm nan tang 376 a chhuah dawn. Jail tang chhuah tur zinga 111 chu Guwahati Central Jail-a tang mek an ni. Anni bakah hian Nalbari, Dhubri, Karimganj, North Lakhimpur, Golaghat, Diphu leh Udalguri district jail-a tang ṭhenkhat chu chhuah an ni ang. 

Inspector General of Prisons Dasarath Das chuan state chhunga jail 10-a tang zingah hri kai mi 535 hmuh an ni tawh tih sawiin, Guwahati Central Jail-a tang zinga 435 an tel tih a sawi. Guwahati Jail-ah hian hri kai, asymptomatic-te enkawlna tur khum 200 awmna Covid Care Centre (CCC) siam a ni a, Nagaon Special Jail-ah CCC hi siammek a ni bawk. 

Das chuan Supreme Court thurawn angin, jail chhung tawt tihziaawmna turin tang hi chhuah ṭhen an ni dawn tih a sawi. March thla thleng khan tang 6,801 an chhuah tawh tih a sawi bawk a ni. Assam-a hri kai hmuh chhuah tawh hi 28,791 an tling tawh a, Ningani khan hmuh chhuah thar mi 1,047 awmin an zinga 219 chu Guwahati khawpuia mi an ni. Hri kai zinga 19,350 chu enkawl dam tawh niin enkawl mek mi 9,368 an awm a, mi 70  in an thihpui tawh bawk.