Manipur : Women group-ten zu khapna hlih duh lohna lantir

Manipur sorkarin an state chhunga zu khapna dan hman mek chu hmun ṭhenkhata hlih a rel a, hei hi pawl hrang hrangin an sawisel.

Ningani khan hmeichhe pawl hrang hrang chuan Imphal West-a Thangmeiband-a THAU Ground Gate-ah zu khapna hlih ṭhen tumna hi duh loin sit-in protest an huaihawt.

All Manipur Women’s Social Reformation and Development Samaj (Nupi Samaj), Khunthokhanbi Nishaband College Gate, Thau Meira Paibi, leh Thanil-te huaihawt lungawi lohna lantirnaa telte chuan state cabinet-in zu khapna hlih ṭhen a remtihna chu sut leh turin an phut.

Nupi Samaj advisor Khundrakpam Indu Devi chuan, "Sorkarin zu zawrh a remtih avangin lungawi lohna kan lantir a ni. Hei hi naupangte nunna chhanhimna tura ti kan ni," a ti. Nupi Samaj hi kum 1978-a din niin, an state-a zu khap a nih theihna atan sorkar an nawr fo a ni.

Coalition against Drugs and Alcohol (CADA) secretary general, Geetchandra Mangang chuan zu khapna hlih tum chungchangah sorkar chuan CADA leh mother's group-te pawh a berawn a, an duh loh thu pawh an hrilh a, mahse sorkar chuan an thil phut chu ngaihthahin a duh angin a titlang ta tho a ni, a ti.

Zu khapna dan hlih duh lohna hi lantir chhunzawm zel an tum thu Geetchandra chuan a sawi bawk.

Nawrh an huaihawtna hmunah thuziak hrang hrang, state cabinet thutlukna an pawm loh thu te, zu zawrh an duh loh thute an keng a, a hnuah Khyathong panin kawng an zawh zui bawk a ni.