Arunachal leh Assam-a regional committee-in joint meeting nei

Arunachal Pradesh leh Assam chuan kum tam tak state ramri chungchanga buaina an neih tawh chinfelna turin hma an la mek a, ramri chungchang buaipui tura state pahnihten an din, regional committee chuan Ningani khan joint meeting an nei.

Arunachal Pradesh-a Namsai, Lohit leh Lower Dibanga Valley regional committee leh Assam-a Tinsukia district regional committee-ten Dibrugarh-ah joint meeting hi an nei a ni.

AP deputy chief minister Chowna Mein chuan state pahnih sorkar chuan kum tam tak ramri buaina an neih chu chinfel ngei an tum tih sawiin, prime minister Narendra Modi leh union home minister Amit Shah-te kaihhruaina hnuaiah kawng dik lam an pan zel tih a sawi.

Mein chuan Namsai leh Tinsukia bakah Lohit leh Tinsukia ramriah chuan buaina lian tham an neih loh avangin chinfel a ni hnai tawh tih a sawi bawk. An buaina la neih chu district MLA-te hian stakeholder-te be rawnin, an pawm tlan theih tur ang inremna an siam thei mai dawn niin a tarlang.

Regional committee joint meeting report hi Assam leh Arunachal Pradesh chief minister-te hnenah October 15 hmain thehluh a ni ang.

August 22 khan inter-state regional committee joint meeting hmasa ber hi Namsai-ah neih a ni a, hemi ṭum hian Lower Dibang Valley district leh Tinsukia district ramri chungchang sawiho a ni. Mahse thutlukna an la siam lo a, report thehlut hmain border area hi state pahnih aiawhte hian enfiah leh phawt an rel a ni.