Assam, Meghalaya leh AP-te'n Governor thar an nei

Hmarchhak state pathum - Assam, Megha­laya leh Arunachal Pradesh-te chuan Governor thar an nei. Kar kalta Inrinni khan President Ram Nath Kovind-a'n Go­vernor thar a ruat mi panga-te chu an hming leh, an awmna tur state te puan a ni.

Assam Governor thar atan hian Jagdish Mukhi chu ruat a ni a, Meghalaya Governor atan Ganga Prasad chu ruat niin, Brig (Dr) BD Mishra (Retd) chu Arunachal Pradesh Gover­nor thar atan ruat a ni bawk.

Assam Governor Jagdish Mukhi hian kum 1975 khan politics a luhchilh a, Delhi sorkar-ah Finance, Planning, Excise & Taxation leh Higher Education portfolio te a lo chelh tawh a ni. Assam governor atana ruat a nih hma hian Andaman & Nicobar Islands-ah Lieutenant Governor-in a lo awm tawh bawk. Meghalaya Governor Ganga Prasad hi Bihar chhuak niin, kum 1994 khan Bihar Legislative Council atan thlan a ni a, kum 18 chhung MLC a ni a, Legislative Council-ah eptu hruaitu a ni bawk. BJP hruaitu hlun tak a ni. Arunachal Governor, Brig (Dr) BD Mishra (Retd) hi chu Indian Army retire a ni a, kum 34 chhung sipai-ah a ṭang a ni. NSG (Black Cat Commando) Counter Hijact Task Force commander a ni tawh a, a kaihhruaina hnuaiah kum 1993 khan Indian Airlines fligh-a thawktu leh passenger 124 hijack-te chu hlawhtling taka chhanchhuah an ni. Kum 1962-a China dona leh, 1972-a Pakistan nena indonaah pawh khan a tel a ni.

Dr. B.D Mishra chuan a chunga rinna nghattu President Ram Nath Kovind leh Prime Minister-te chungah lawmthu sawiin, ram danpui zah tak chunga an hna hlenchhuah ngei a tum thu a sawi. Arunachal Governor atana ruat a ni chu a lawm hle tih sawiin, state mipuite tan theihtawp a chhuah tur thu leh hmasawnna tura kawngdik zawhpui a tum thu a sawi. Ram danpui zahawmna vawnnun chu a ngaihpawimawh ber a nih thu sawiin, mipuite himna tura dan leh thupek ṭha taka kenkawh a tum thu a sawi. Arunachal Pradesh chu state lian ni lo mah se hmun nuam leh ralmuang a nih thu a sawi a, state hmasawn leh intodelh ber te zing ami a nih theih nan theihtawp chhuah a inhuam thu a sawi bawk.

Rashtrapati Bhawan chuan a hmain President Ram Nath Kovind-a'n Governor thar panga a ruat thu a lo tarlang tawh a, Inrinni khan an awmna state turte puan a ni ta a ni. Arunachal Pradesh bakah hian, Bihar, Tamil Nadu, Assam leh Meghalay-te chuan Governor thar hi an nei a ni.