CBI-te'n Louis Berger Bribery Case-ah FIR an thehlut

Central Bureau of Investigation (CBI) chuan Louis Berger Bribery Case an chhuina kal zelah tun hnai khan First Information Report (FIR) an thehlut.

Gauhati High Court chuan Louis Berger Bri­bery Case hi CBI chhuitir turin thupek a lo tichhuak tawh a, CBI hian an chhui zui mek a ni. He case hi Assam Criminal Investigation Department chuan hun eng emaw chen a lo chhui tawh bawk a, mahse hna an thawh muan avangin tun hnai khan CBI kutah hlan a ni ta a ni.

U.S multinational company Louis Berger International hian Goa leh Assam-a Guwahati-ahte water supply project an kalpui a, he thilah hian eirukna nasa tak a awm nia sawi a ni. Project atan hian Assam sorkar, Guwahati Metropolitan Development Authority leh Louis Berger Inter­national-te hian inremna an ziak a, kum 2015 khan Louis Berger lakah hian thubuai ziahluh a ni. Petition thehluttu chuan US company hi cheng vaibelchhe 1.71 chawi turin a phut a, CBI chhui tir turin a ngen bawk.