Nagaland leh AP-ah thla 6 atan AFSPA pawtsei

Union Home Ministry chuan kar liam ta Inrinni khan sipai hnena thuneihna sang pekna, Armed Forces Special Powers Act (AFSPA) chu Nagaland leh Arunachal Pradesh-ah a pawtsei leh.

Dan sakei tia sawi ṭhin, AFSPA hi hmarchhak state ṭhenkhatah hman mek niin, state mipuiten duh loin hlip turin sorkar laipui an nawr reng a ni. Hetichung hian sorkar laipui chuan state pahniha AFSPA hman mek hi a pawtsei leh ta zawk a ni.

Arunachal Pradesh-ah chuan Tirap, Changland, Longding district-ahte leh, Namai district-a Namsai & Mahdevpur police station huam chhung chu 'disturbed area'-ah puangin he dan hi hman a ni.

Nagaland-ah chuan district pakua - Dimapur, Niuland, Chumoukedima, Mon, Kiphire, Noklak, Phek, Peren leh Zunheboto-ahte AFSPA hi hman a ni bawk.

Nikum December thlaa Nagaland-a Mon district-a sipaiten an hriatsual avanga civil mi 13 an kahhlum hnuah AFSPA duh lohna hi nasa taka lantir leh a ni a, hemi hnu hian Home Ministry chuan Assam, Manipur leh Nagaland-a AFSPA hmanna te chu a titlem a ni.

Kum 2015 khan Tripura aṭangin AFSPA hi hlih a ni a; kum 2018, April 1 khan Meghalaya aṭangin hlih a ni bawk.

Naga zirlaiten AFSPA pawhsei an dem
Naga Students' Federation (NSF) chuan sorkar laipuiin an state-a AFSPA a pawtsei leh chu an dem thu sawiin, lungawi lohna an lantir nghal.

AFSPA hmangin sipaite nasa takin an inluling a, human rights bawhchhiatna pawh a nasa ṭhin tih sawiin, sorkar laipui chuan an state dinhmunte uluk taka enfiah zawk tur leh, agency-te report dik tawk lohte hmanga thutlukna siam mai lo turin an phut.

Nagaland state pum aṭanga AFSPA hlih a nih loh chuan, Naga mipuite pawh Indian Armed force emaw, paramilitary forces emaw pawh thawhpui lo turin an ngen bawk a ni.