Meghalaya HC-in BJP hruaitu bail dilna remtihsak

Meghalaya High Court chuan farmhouse-a nawhchizawrhna hmun siama puha man, state BJP hruaitu Bernard N Marak-a'n bail-a chhuah a dilna chu a remtihsak.

Court chuan intiamkamna nen bail-a chhuah hi phalsakin, a chhuah chhungin Barak chu a bibo tur a ni lo a, an puhna chungchanga finfiahna awmte a khawih danglam tur a ni lo a, ram pawnah zinchhuak lo tur leh, police-te pawh an thil chhuinaah ṭha takin a thawhpui tur a ni, a ti. Rs 50,000 dah kham turin a ti bawk.

Marak-a nupui, LK Gracy chuan bail dilna hi Zirtawpni liam ta khan thehlutin, Inrinni-ah court chuan a ngaihtuah a ni. Court chuan farmhouse neitu hi Marak a ni ngei a, mahse he hmun hi nawhchizawrhna atana hman a ni ngei em tih finfiahna a la chiang tawk lo niin a sawi.

Helpawl hruaitu hlui, Marak hi police-ten Tura-a a private farmhouse, 'Rimpu Bagan' an dap hnuah Uttar Pradesh-a Hapur district-ah an man a ni. Farmhouse an dapnaah hian police-te chuan mi 73 an man a, an zingah hian kum tling lo paruk - mipa pali leh hmeichhia pahnih an tel.

Tura-a women police station-ah BJP hruaitu lakah hian Immoral Trafficking (Prevention) Act, 1956-a section hrang hrang hnuaiah thubuai ziahluh a ni.