Sikkim : Jacob Khaling-a'n a lakah thubuai thehlut turin BJP MLA cho

Sikkim chief minister Prem Singh Tamang-a political secretary, Jacok Kaling chuan BJP MLA Narendra Kumar Subba-an Kristian sakhaw chawi lar tumin a nihna a hmang ṭangkai nia a puhna chu chhangin, an puhna finfiahna a neih chuan a lakah thubuai thehlut turin a cho.

Rai hi Kristian a ni a, Kristian sakhua chawilar leh, midangte Kristiana inlehtirna kawngah a nihna hi a hmang ṭangkai niin BJP MLA Subba chuan a sawi a, hemi chungchang Delhi-based lawyer Alok Kumar, Vishva Hindu Parishad (VHP) hruaitu ni bawk chuan union home minister Amit Shah hnenah a thlen a ni.

An puhna chungchang a hriat hian a ṭhawngin, a rilru pawh a tina hle tih Rai chuan a sawi. A dinhmun chu sakhaw bil chawilar emaw, sakhaw dang dodalna atan emaw a hmang ngai lo a, Sikkim mipuite tan a theihtawp a chhuah ṭhin tih a sawi. BJP MLA-in a puhna chungchangah finfiahna a awm a nih chuan a laka thubuai thehlut turin a ti a, hemi rual hian BJP MLA hi an state-a sakhaw inkara boruak ṭha lo siam tumah a puh bawk.

Rai chuan a dinhmun avangin sakhaw hrang hrang hun pawimawhah pawh a tel ve zel tih sawiin, Sikkim leh West Bengal-a hill district- Kalimpong leh Darjeeling ah chuan a pian hma aṭangin Kristian sakhaw zuitu an pung chho a, hemi avang hian amah chu mawhphurtuah puh ngawt tur a ni lo, a ti.