China-in Arunachal ramri depah expressway hawng

China chuan Aruanchal Pardesh ramri dep-ah Tibet kal pawhna tur expressway a hawng thar tih China news agency, Xinhua chuan Pathianni khan a tarlang.

Xinhua news agency-in a tarlan dan chuan expressway hi Tibet kalpawhna tura siam a ni a, km 409-a thuia siam a ni. He expressway hmang hian Tibet provincial capital Lhasa leh Nyingchi chu a kalpawh theih tawh dawn a ni. China sorkar chuan hei hi khualzin ten awlsam zawka Tibet an tlawh theihna tura siam a nih thu a tarlang. Kawngpui hi hawn a nih tak avangin Lhasa leh Nyingchi inkara dar kar riat hun hman ngai ṭhin chu darkar nga chauh hun hman a ngai tawh dawn a ni.

Expressway hi Arunachal ramri depa awm a nih avangin India chuan a helh hle rin a ni a, hetih rual hian thuchhuah erawh a la nei lo thung. China-in ralthuam leh hmaraw dangte awlsam zawka a khawih chet leh dahsawn theihna remchang a nih avangin a ngaihmawh rin a ni. Hetih lai hian Lhasa-Nyingchi expressway-ah hian bungraw rit phur truck tlan phal ala ni rih lo niin, Xinhua chuan a tarlang.

China-in ramria kawngpui a hawn leh tak avang hian ram pahnih inkarah boruak ṭha lo a awm leh mai a hlauhthawnawm hle. Kumin June thla aṭang khan China leh India te hi Sikkim Sector-a Doklam-ah an inep a, hei pawh hi China-in he lai hmuna inkalpawhna kawngpui a siam vang a ni. Ramri-ah sipai te chu hun eng emaw chen an inep a, an boruak pawh a chhe hman hle. Ram pahnih hruaituten inbiakna an neih hnuah August 28 khan an sipaite hnuhkir an remti ta chauh a ni.