Meghalaya-ah ruah sur nasa vangin harsatna thleng

Meghalaya-ah tun hnai ni thum liam ta vel khan ruah nasa takin a sur a, hei hian hmun tam takah harsatna a thlen.

West, South West leh North Garo Hills region-ahte ruahsur nasa vang hian mi tam takin harsatna an tawk a, Assam panna National Highway 51 pawh Inrinni thleng khan lirthei kaltlang theih lohin ala ping a ni. Hmun tam takah tui a len avangin chhungkaw eng emaw zatin an in leh lo an chhuahsan a, hmun him lahah sawn an ni. Chhiatna hrang hrang tuarte tan hian relief camp pali siam a ni tawh a, heng hmunah te hian ei leh in tur pawh sem a ni. North Garo Hills-ah chuan khaw riat zel chuan tuilian avang hian harsatna an tawk nia tarlan a ni.

Pathianni thleng khan tuilian hian ziaawm lam a la pan lo a, hmun tam takah hlauhawm chhinchhiahna an la pel a ni. West Garo Hills-ah chuan Tikrikilla, Chibinang leh Rajabala khua te chuan tuilian hi an tuar nasa zual a, chhung­kaw 23 vel chu hmun him lamah sawn chhuah an ni. District deputy commissioner Pravin Bakshi chuan harsatna tawk te tan hian Gagua­para, Bakpara, Kodam­sali, Berupara, Abhiram­para, Dhelapara, Photamati, Rongmali leh Bakripara-ahte relief camp siam a nih thu a sawi.

Tuilian hian hmun tam takah lei a lenchhiat avangin inkalpawhna pawh a buai phah hle nia tarlan a ni a, lei min avangin khaw eng emaw zat chu tlawh pawh theih lohin an awm mek bawk.