Shantanu Murder Case : SIT-te'n hnuchhui hna an ṭan

Tripura sorkarin local TV journalist Shantanu Bhowmik-a thihdan chhui tura a din Special Investigative Team (SIT)-te chuan an hna an thawk ṭan ta.

Journalist Shantanu Bhow­mik-a hi Indigenous People's Front of Tripura leh rorel lai Communist Party of India-Marxist (CPI-M)-te inkara buaina chhuakah a thi a ni. He thil thlengah hian IPFT mi leh sa te chu mawhphurtuah ngaih an ni a, chhui zui mek a ni. A chhui hna thawk tur hian state sorkar chuan member panga awmna SIT a din a, Inspector General (IG) chuan a ho a ni. SIT-te hian state sorkarah report an thehlut leh dawn a ni.

Hetih lai hian pawl hrang hrangte chuan he thil thleng hi Central Bureau of Investigation (CBI) chhui tir an phut thu an sawi. Agartala Press Club leh Working Journalists’ organisation-te chuan CBI kuta hlan ngei an phut thu an sawi a, Congress party chuan judicial inquiry tih a nih theih nan High Court Judge kuta hlan an phut thu an sawi.

He pawikhawihna thlenga mawhphurtu bera puh IPFT lam pawhin CBI kuta hlan an phut thu an sawi a, pawisawi lo an mi leh sa hren mek te chu chhuah an phut thu an sawi bawk. An mi leh sa te chu finfiahna awm lo leh, chhan mumal pawh awm loa man an nih thu an sawi bawk. IPFT General Secretary Mebar Kumar Jamatia chuan hemi chungchang ngaihtuah hian meeting neih an tum tih sawiin, an kal zel dan tur an rel dawn tih a sawi.

Deputy Inspector General of Police (Southern Range) Arindam Nath chuan journalist thahnaa mawhphurtu bera puh IPFT mi leh sa Sachin Debbarma chu man a nih tawh thu a lo sawi tawh. Sachin hi hel pawl National Liberation Front of Tripura (NLFT) mi leh sa nia sawi a awm a, tribal party Indigenous People’s Front of Tripura (IPFT) member a ni bawk.

Tripura-ah hian rorellai Communist Party of India - Marxist (CPI-M) tribal wing, Tripura Rajaer Upajati Ganamukti Parishad (TRUGP) leh Indigenous People’s Front of Tripura (IPFT)-te inkarah September 19 khan buaina a chhuak a, local television channel-a thawk lai journalist Shantanu Bhowmik (28) chu rukbo a nih hnuah hliam na tak tuara hmuh a ni. A ni bakah hian midang 60 velin hliam an tuar. Bhowmik hian hliam na tak a tuar a, Govind Ballabh Pant Medical College and Hospital panpui a nih hnuah a hliam tuar loin a thi zui a ni.

Buaina chhuak avang hian West Tripura leh Khowai district-ahte mipui punkhawm khapna thupek tihchhuah a lo ni tawh a, internet leh SMS service-te pawh tihtawp lailawk a ngaih phah hial bawk. He thil thleng chungchang ngaihtuah hian Chief Minister Manik Sarkar chuan high level review meeting a ko tawh bawk a ni. Cabinet Meeting pawhin he thil thleng hi SIT kuta hlan alo remtih tawh a, Bhowmik-a nu chu sorkar hna pek a remti bawk.