Arunachal Pradesh Governor thar lalut

Brigadier (Retd.) B.D. Mishra chu Arunachal Pradesh Governor thar atan nimin khan Gauhati High Court Chief Justice Ajit Singh-an a lalut.

Governor thar lakluh inkhawm­ah hian Deputy Chief Minister Chowna Mein, Union Minister of State Kiren Rijiju, Assembly Speaker T.N. Thongdok, Council of Minister leh MLA te, Chief Secretary Shakuntala Gamlin, sorkar leh sipai lam mi pawimawh tam tak an tel a ni.

Mishra hian Nagaland Gover­nor Padmanabha Balakrishna Acharya a thlak a, Acharya hian Nagaland bakah Arunachal Pradesh Governor hna hi a hmui tel a ni. Hei hi January 26-a Arunachal Pradesh Governor aṭanga V. Shanmuganathan a ban vang a ni.

Mishra hi July 31, 1995 khan Indian Army atangin Brigadier niin a pension a, kum 34 a service hnuah a chawl a ni.

Mishra hi NSG (Black Cat Commandos) Counter Hijack Task Force ten kum 1993-a Indian Airlines hijack a nih ṭuma hlawhtling taka passenger 124 leh thawktute an chhuanchhuah ṭum khan Commander kha a ni. 1962 a China leh India indonaah khan a tel bawk a, 1971 a Pakistan leh India indo ṭum pawh khan a tel bawk a ni. 1963-1964 kuma naga insurgency movement beih letna ah khan mi ṭangkai tak a ni bawk.

Mishra hian Allahabad Uni­versity atangin MA a zo a, Madras University atangin M.Sc a zo leh bawk a, Jiwaji University, Gwalior atangin Ph.D degree a hmu bawk a ni. MHOW Cantonment a College of Combat-ah leh Defence Services Staff College, Wellington Cantonment-ah te a zirtir thin bawk a ni.