Journalist-ten lungawi lohna lantir

Journalist-ten press mite laka tharum thawhna leh vauna thleng ṭhin duh lohna lantira nimina ram pum huapa nawrh an huaihawt chu hmarchhak state-ah pawh an zawm ve.

Manipur-ah chuan All Manipur Working Jour­nalists Union (AMWJU) te huaihawt in Manipur journalist te chuan sit-in protest an nei. An thuziah kenah chuan Journalist thah chu buaina chinfelna a nilo, Shantanu Bhowmik thah a ni hi kan dem tih te leh Journalist te hi thah tura hnathawk kan nilo tih te a inziak. Manipur ah hian journalist paruk vel thah an ni tawh a, vauna leh tihhrehawm te pawh an tawk fo bawk a ni.

Tripura journalist te pawhin sit-in protest neiin CBI te chu September ni 20 a thah Santanu Bhowmick-a thih dan chhui tir an phut thu an sawi. He sit-in protest hi Raj Bhavan bula Mahatma Gandhi lim bulah neiin Tripura Newspaper Society President Subal Kumar Dey kaihhruaina hnuaiah journalist pawl 11 an tel a ni.

Dey chuan Santanu thah a nih hma leh thah a nih hnu ah pawh Tripura police lamin journalist-te thah an nih ṭhin dan chu an ngaihthah thu sawiin CBI in chhui se thudik alo lanchhuah a beisei thu a sawi a ni.

Depity Inspector Gene­ral of Police (Sou­thern Range) Arindam Nath chuan mi pathum an man tawh thu sawiin tualthahna thubuaia rinhlelh kai ber Sachin Debbarma pawh a tel thu a sawi a, Special Investigative Team (SIT) te pawhin hma an la tan tawh bawk a ni. Police thuchhuah chuan kum 29 mi Jiban Debnath, private motor khalhtu chu September ni 20 atanga a awmna chin hriat a nihloh thu leh zawn mek a nih thu an tarlang bawk a ni.