Oil and Natural Gas Corporation-in Drilling project kalpui nan vaibelchhe 456 hmu

Oil and Natural Gas Corpo­ration (ONGC) te chuan Assam-a Sivasagar district-a drilling project kalpuina turin cheng vaibelchhe 456 a dawng.

Company in a ruahman dan chuan oil khur hi hmun 10-a verh tur a ni a. Rudrasagar, Geleki, Lakwa, Namti, Mekypore, Santak Nazira ah te hian verh tura ruahman a ni. Oil khur pakhat hian ram hectares 1.5-2.25 vela zau a mamawh dawn a, he project atana sum ruahman zat chu vaibelchhe 456.20 a ni.

Union environment ministry in ONGC hnenah hian Assam-a he project kalpuina turin envi­ronmental clearance pawh a pe tawh a ni. Mahse clearance an hmuh hi sorkar lamin chhan mumal tak neiin an pe a ni. An ruahmannaa an tarlan danin ONGC lam chuan heng oil khur an verh turah hian beiseina sang tak an nei a, oil leh gas tam tak an hmuhchhuah ngei an in beisei a ni.

An project chhawpchhuah hian an block-a hydro­carbons hmuhchhuah kawngah te a puih beisei a ni a, ram dang aṭanga oil lakluh zat titlem tur leh oil hmuhchhuah leh hmanral zat in balance lo te a sutkian beisei a ni. He an project kalpui tur hian Assam chhunga sumdawnna lam pawn hlawkna a la nei thei dawn a, state leh central sorkar tan oil leh gas revenue pawimawh tak a ni thei dawn a ni, an ti.

Ram chhunga crude oil hmuhchhuah zinga 70% vel leh natural gas 60% vel hi ONCG te laihchhuah a hi a ni a, an international subsidiary, ONCG Videsh te hian ram 15 ah project an kalpui bawk a ni.