Nagaland Ad-Hoc teacher-ten ni 8 nawrh huaihawt tawh

All Nagaland Ad hoc Teachers Group (ANATG)-2015 batch-in an hnaa dah nghet phuta tiam chin awm loa nawrh an huaihawt chu nimin kha a ni riatna a ni tawh. Hetih lai hian an thil phut chungchangah sorkar nen inremna an la siam thei lo.

ANATG member 1,166-te hian kar liam ta Thawhṭanni aṭanga Ningani khan State Civil Secretariat kawtah sit-in protest hi an huaihawt a, mahse sorkar lam aṭanga an beisei ang chhanna an hmuh loh avangin an nawrh huaihawt dan hi an thlak a ni. Ningani zan aṭang khan an zinga 38 chuan chaw an nghei ṭan a, midangte hian sit-in protest hi an lo chhunzawm bawk.

State sorkarin an thil phut ngaihtuah leh buaipui tura high-powered committee din a rawtna chu ad-hoc teacher-te hian an hnawl a, an hnaah dah ngheh an phutna chu tihhlawhtlin a nih hma chuan nawrh chhunzawm zel an tum tih an sawi.

Hetih lai hian state sorkar chuan Supreme Court leh High Court aṭangin ad-hoc teacher-te dah nghet lo tura thupek ding lai a awm avangin nawrh huaihawtte thil phut hi a tihhlawtling thei rih lo tih a sawi.

Directorate of school education-a principal director, Thavaseelan Ka chuan ANATG-2015 batch-te ruat an nih dan chu dan kalh ni lo mah se, sanction post-te dahna tura norm mumal taka ruat an ni lo tih a sawi. Hei vang hian ad-hoc teacher-te chu court lamah kal a, thupek lo tihchhuah tawh chu sut tura nawr turin a ti a ni. Mahse ANATG chuan court thupek dinglai awm reng chungin, sorkar department dangah ad-hoc a dahte chu dah ngheh chhoh an ni tho tih an sawi a ni.