Vawiin-ah Meghalaya Governor thar lalut dawn

Meghalaya Governor thar tur Ganga Prasad chu vawiin hian lakluh a ni dawn a, lakluh inkhawm hi Raj Bhavan, Shillong-ah neih a ni ang.

Governor thar tur Prasad hi Meghalaya High Court Chief Justice Dinesh Maheshwari chuan rinawmna thu tiam tirin a la lut dawn a ni. Lakluh inkhawm hi tlai dar 4-ah neih a ni ang.

Bihar Legislative Council member hlui Ganga Prasad hi President Ram Nath Kovin-a'n September 30 khan Meghalaya Governor turin alo ruat tawh a ni. Bihar legislative council-ah Prasad hi kum 18 lai member alo ni tawh. Prasad hi sumdawng mi niin, 1967 khan politics-ah a zuanglut a, Jan Sangh a zawm a ni. Jan Sangh aṭang hian BJP-a zawm a, mawhphurhna hrang hrang alo chelh tawh ṭhin a ni. A fapa Sanjeev Chaurasia Digha Constituency, Bihar a Patna District ah BJP MLA a ni mek bawk.