Tripura Journalist Murder Case : Media leh BJP-te'n CBI chhui tir phut

Tripura-a media pawl hrang hrang leh opposition party Bharatiya Janata Party (BJP)-te chuan journalist Santana Bhowmik-a thih dan chhui turin Central Bureau of Investigation (CBI) kohluh an phut thu an sawi. Hetih lai hian he tualthah thubuai chhui tura state sorkarin a din Special Investigation Team (SIT) chuan an hna an thawk ṭan tawh a ni.

Media pawl 11 leh BJP-te chuan an thil phut chungchangah hian thuchhuah an siam a, CPI-M kaihhruai sorkar chu CBI ko lut thuai tura an phut thu an tarlang. State sorkarin he thil thleng chhui tura a din Special Investigation Team (SIT) kuta hlan chu an duh khawp lo tih sawiin, CBI kuta hlan chu an duh ber a nih thu an sawi. Hetih rual hian journalist Bhowmik-a thihnaa mawhphurtute chu zawnchhuah thuai an phut thu an sawi a, thilsual titute chu dan anga hremna pek an phut a ni. State BJP president Biplab Kumar Deb chuan an thilphut chungchangah hian sorkar chu hma la thuai tura an phut thu sawiin, an thilphutte a hlawhtling lo a nih chuan na zawka hma lak an tum thu a sawi.

Journalist Santana Bhowmik-a hi September 19-a tribal party pahnih IPFT leh TUGMP-te inkara buaina chhuakah khan vanduaina tawkin, rukbo a ni. Mundai aṭanga rukbo a nih hnu hian hliam na tak tuara hmuh a ni a, a hliam tuar lo hian September 20 khan a thi zui ta a ni. He thil thlengah hian IPFT activist-te chu mawhphurtua puh an ni a, mi eng emaw zat man an ni tawh bawk.

Hetih lai hian Chief Minister Manik Sarkar-a kaihhruai sorkar chuan Bhowmik-a chhungte hnenah zángnadawmna cheng nuai 10 pek a nih tur thu alo puang tawh a, a nu chu sorkar hna pek a tiam bawk.