Sikkim-a Pemayangste Monastery in chawimawina dawng

Pemayangste Monastery, Sikkim ami chuan Gandhi Jayanti Swachh Bharat Mission (GJSBM) kum thum an hmanna ni, October 3 khan chawimawina a dawng. GJSBM hnuaia ram pum huap inelna category pakhat, “Zerowaste Religious Institutions” award chu Sangchen Pemayangtse Monastery hnenah hian hlan a ni a, bawlhhlawh awm lohna hmuna an siam avangin he chawimawina hi hlan a ni.

He inelnaah hian Urban Development & Housing Depart­ment chuan West Sikkim-a Sang­chen Pemayangtse Monastery hi an nominate a, rampum huapa faina lama hmalakna, Swachh Bharat mission kalpuina kawngah monastery hian an hmun hma bawlhhlawh awm lohna hmuna siam turin hma an la nasa hle a, bawlhhlawh siam thei reng reng ken luh an phallo a, packaged drinking water thlengin kenluh an khap.

He category-a inelna a tel zawng zawngah hian Sangchen Pemayangtse Monastery chiah hi sakhaw kaihhnawih hmun a ni a, chawimawina inkhawm hi New Delhi-a Vigyan Bhawan-ah Prime Minister Narendra Modi kaihhruaina hnuaiah neih a ni.

Monastery aiawh hian Ven. Khempo Wangyal Dorji leh Pema Rinzing ten chawimawina hi Union Minister of State(I/C), Housing & Urban Affairs, Hardeep Singh Puri hnen aṭangin an dawng a ni.