Defence Minister-in Sikkim leh Arunachal tlawh dawn

Defence Minister Nirmala Sitharaman-i chuan China ramri depa awm Sikkim leh Arunachal Pradesh-te chu October 7 leh 8 hian a tlawh dawn.

Sorkar official chuan, defence minister hian tun hnaia India leh China sipaite inepna hmun, Doklam a tlawh dawn tih a sawi. India-China-Bhutan tri-junction, Doklam-ah hian China chuan kawngpui a sial a, hemi titawp tur hian India chuan sipai eng emaw zat a tir lut a, thla hnih chhung vel zet an inep a ni. China chuan India sipaite chu dan loa ramri kanah puhin an ram lamah kir turin a vau a, hetih lai hian India chuan China chu a ram chin bak pela dan kalha cheah a puh ve thung. Ram pahnihte inkar boruak hi a ṭang hman hle a, ramriah hian sipai 3000 vel zet tirhluh an ni hman a ni.

Ram pahnih inkar boruak ṭha lo avang hian China-a BRICS summit hmanga kal Prime Minister Narendra Modi leh China president Xi Jinping-te pawhin inbiakna an nei dawn lo nia tarlan a ni a, mahse ram pahnih hruaitute hian inbiakna an neih hnuah, Doklam aṭanga an sipaite lakkir hi an remti thei ta a ni.

Defence Minister-in Sikkim leh Arunachal Pradesh a tlawh tur chungchangah hian China chuan thuchhuah ala siam lo a, eng ang takin nge a chhanlet dawn hriat a ni lo. Sitharaman-i hian a cham chhung hian ram venhimna chungchangah Eastern command ooffical-te meeting a neihpui rin a ni. Sikkim leh Arunachal-a hun a hman zawh hnu hian Gujarat a tlawh leh nghal dawn bawk a, tuipuia venhimna kalpui dan a hmunah a enfiah dawn a ni.