Chakma-te'n SC order hman thuai an phut

Chakma National Council of India (CNCI) chuan Supreme Court-in Arunachal Pradesh-a Chakma leh Hajong-te hnena khua leh tui nihna pekna tur thupek a tihchhuah chu a taka hman an duh thu an sawi.

CNCI chuan kum 2015 khan Supreme Court chuan Chakma-Hajong-te citizenship pe turin a lo hriattir tawh tih sawiin, hei hi a taka hman thuai an phut thu an sawi. CNCI hian tun hnai khan ni hnih awh conference an buatsaih a, Nilaini khan zawh fel a ni. He hunah hian chakma pawl hrang hrangte an tel a, Tripura, Mizoram leh Arunachal-a cheng Chakma zawng zawngte chu khua leh tui nihna hi pek thuai an phut an sawi.

Tripura-ah hian Chakma 79,813 vel an awm mek a, Mizoram-ah pawh eng emaw zat an khawsa. Mizoram-a Chakma District Autonomous Council chu tihchangtlun an phut thu te, hamṭhatna an dawn tur ang te an dawn thuai theihna tura chak zawka hma lak an phut thu te an sawi a ni.

Union Minister of State for Home Rijiju chuan Arunachal-a Chakma leh Hajong refugee-te chu sorkar laipuiin citizenship a pek tur thu a lo sawi tawh a, mahse hei hian ram leilung fate hamṭhatna chu a pawlhdal dawn lo niin a sawi. Mahse hei hi pawl hrang hrangte chuan an duh loh thu leh, sut leh tura an phut thu an sawi a ni. Supreme Court leh sorkar laipui thutlukna duh lohna lantir hian All Arunachal Pradesh Students Union (AAPSU)-te chuan nawrh an lo huaihawt tawh a, hei hi state sorkar pawhin a thlawp a ni. Political party leh pawl hrang hrangte pawhin an thlawp thu an sawi. Rijiju ngei pawhin Chakma leh Hajong-te khua leh tui nihna pek hi a thlawp loh thu a lo sawi tawh bawk.