Sorkar laipui-in Nagaland-ah Kawngpui 5 siam belh a remti

Sorkar laipui chuan kawngchhiat nasat avanga buai mek Nagaland-ah kawngpui 5 siam belh a remti.

Nagaland unit BJP te chuan sorkar laipui chuan kawngpui 5 siambelh chu a remtih tawh thu sawiin hemi atana ruahmanna kimchang zawk pawh thehluh vat a nih tur thu an tarlang.

Kawng siam nana ruahmanna hi Ministry of Road Transport and High­ways hnenah May 5 khan thehluh alo ni tawh a, Union Minister for Road Transport and Highways Nitin Gadkari chuan a pawmsak tawh bawk a ni.

Kawngpui thar tur an pawmsak chu National Highway 29 Dimapur bypass, Trans Eastern Highway aṭanga Mon-Longwa-Pangsha-Kiphire-Avengkhu, Showuba-Gutunyu-Pughoboto-Zunheboto-Agunato-Shamator-Noklak-Pangsha, Gandhi Ashram Chukuyimlang NH 2 aṭanga Pangsha leh Maibung ami Tening aṭanga Tamenglong,Tamei, Manipur kaltlang te a ni. Kawngpui siam thar tur sei zawng hi Km 724.70 a ni.

Nagaland Unit BJP President hlui M Chuba Ao chuan sorkar laipui lam pawhin kawngpui thar siam tur hi an pawmpui tawh thu leh, hna ṭan a nih vat tur thu a sawi a, Gadkari hnenah pawh hna ṭan vat a nih theih nan lehkha a thehluh tawh thu a sawi tel bawk a ni. Kum 2018 state inthlan neih hma ngeia kawngsiam hi ṭan turin a ti bawk a ni.