Meghalaya CM-in PA Sangma Int'l Medical College lungphum phum

Meghalaya chief minster Conrad K Sangma chuan Thawhṭanni khan Ri Bhoi district-a Khanapara-a 9th Mile-ah PA Sangma International Medical College & Hospital lungphum a phum.

PA Sangma International Medical College & Hospital lungphum hi University of Science and Technology Meghalaya (USTM) premise-ah phum a ni. He hunah hian education minister Lakhmen Rymbui leh USTM Chancellor Mahbubul Hoque-te pawh an tel.

Chief Minister chuan a pa, PA Sangma kum 75 tlinna kuma a hming chawia hospital din tur lungphum a phum thei chu lawmawm a tih thu sawiin, an state-a private medical college hmasa ber tur chu a ṭha tawk hle tura a beisei thu a sawi. A pa, PA Sangma khan USTM din a nih theihna kawngah hma a la nasa nia sawiin, tuna a hming chawia medical college din a ni tur hi a lawm thu sawiin, chhungkaw aiawhin Mahbubul Hoque leh USTM chungah lawmthu a sawi bawk. He institute hi research leh innovation lamah a ṭangkai chhoh hle a beisei thu a tarlang.

Medical college dinna tur atana state sorkarin USTM a thawhpui theih dan tur pawh ngaihtuah leh sawiho mek a ni tih Sangma chuan a sawi.