Tripura : Kristiante ṭawngṭaina hall ṭhiah sak

Tripura-a Gomati district-a Kamlai khuaa Kristianten ṭawngṭaina hall an siam chu sorkar ram chhungah sak nia sawi a nih avangin ṭhiahsak an ni.

Kamlai khua hi Jamatia hnam chhungkaw 150 vel chenna a ni a, he khuaa cheng a tam zawk chu Hindu sakhaw zuitu niin, chhungkaw 25 chu Kristian an ni. Kristiante hian prayer hall hi sorkar ramah an sa nia sawi a ni a, hemi bakah Hindu-te chuan an prayer hall sakna hi Ker Puja an hmanna ṭhin huam chhungah a awm nia sawiin an dodal bawk.

Prayer hall ṭhiah lai video hi social media lamah pawh a darh a, sakhaw pahnih zuitute inkarah buaina a chhuak nia sawi thawmte pawh a awm bawk. Mahse police-te chuan intihbuaina thleng a awm lo tih an sawi thung.

SDPO Ampi Uttam Banik chuan, prayer hall hi mau hmangin, ni 10 liamta chuaha Khasi ramah sak a ni a, Hindu Jamatia-te chuan Kristian-te hnenah hian a structure hi khaw pawn lamah sawn turin an ngen a ni, a ti. Police-te pawh thleng nghalin, buaina engmah a awm loh thu an sawi.