Tripura-ah Rohingya refugee mi pathum man ; Hmarchhak state-te fimkhur turin chah

Tripura, Sonapura-ah Thawh­lehni khan Rohingya refugee mi pathum man an ni a, he thil thleng avang hian hmarchhak state-te chu fimkhur tura chah an ni.

Assam Police-te chuan tun hnaiah Bangladesh aṭanga Rohingya Muslim tlanchhia ten hmarchhak an rawn pan nia sawiin, hmarchhak state hrang hrangte chu fimkhur a

ṭul thu an sawi. Tripura-a Rohingya refugee mi pathum man an nih hnuah hmarchhak state-te chu fimkhur tur leh, Bangladesh ramri-ah te rang zawka venhimna kalpui tura hriattir an ni ta a ni. Tun hnaiah Rohingya refugee-te hian Assam-Tripura interstate border, Churaibari an pan nia sawi a ni.

Assam Police DG Mukesh Sahay chuan, "Rohingya refugee-te hian hmarchhak an rawn pan mek niin kan hria a, ramri kana dan loa lo lut pawh mi pathum man an ni tawh. Judicial custody-ah dah mek an ni a, midang an rwn luh belh lohna turin hma lak mek zel a ni" a ti. Bangladesh-a refugee camp hrang hrang aṭangin refugee-te hian Assam leh hmarchhak state dangah te luh tumin tha an thawh mek niin a sawi bawk.

Mizoram sorkar chuan central security force tam zawk dahbelh turin sorkar laipui a ngen nia sawi a ni a, Myanmar leh Bangladesh-ahte venhim hna thawktu tam zawk dah a ngai nia tarlan a ni. Mizoram leh Myanmar inrina hi km 510 a ni a, Bangladesh nena a inrina pawh km 318 a ni. Ramriah te hian Assam Rifles leh Border Security Force-te chuan venhim hna an thawk mek a ni.

Assam police-te chuan tun hnai khan Rohingya refugee-te awmna nia sawi Sonamura chu an pan a, mahse refugee-te hi an lo inthiarfihlim hman nia tarlan a ni. An mi zawn te hi Sahajahan Choudhary alias Saju, Faruk Mia Choudhury leh Suman Choudhary an nih thu tarlan a ni a, anni hi police-te thlen hma hian Arakan lamah an bibo hman a ni. Police official chuan, "Rohingya Muslim-te hian Puja lawmna chu remchangah lain, India ram rawn luh an tum a ni" a ti. Hei vang hian venhimna pawh uluk a ngai hle tih a sawi bawk.

Myanmar-ah hian Rohingya Muslim hel nia sawite chuan security post-te an beih avangin Myanmar sorkar chuan Rohingya helte lakah hian beihpui a thlak let ve ta a ni. Beihpui thlaknaah hian civil mite chungah tawrhna nasa tak a thleng nia sawi a ni a, hei vang hian Rohingya Muslim-te hian an ṭhenawm ram hrang hrangte chu anmahni remchan dan ang angin an pan a ni.

He thil thleng avang hian Myan­mar sorkar pawhin sawisel leh dem a tawk nasa hle a, State Counsellor Aung San Suu Kyi- ngei pawhin mimala beih a tawh phah a ni. United Nations pawhin Rohingya refugee-te laka tawrhna thleng chu tihtawp a duh thu leh, buaina awm mek chu chinfel thuai a duh thu a tarlang. Hetih lai hian Myanmar sorkar chuan helte lakah chauh beihpui thlak a nih thu a tarlang thung.