Tripura-ah buaina chhuak leh

Nilaini khan Tripura-a Jirania sub-division hnuaia Radhabur Police Station chu tribal mi 300-ten tualthah thubuaia rinhlelh an man chu chhuah tura nawrin an hual a, buaina tenau a chhuak leh.

Jarania, Champaknagar, Khumulwng area-a IPFT leh GMP inkara tharum thawhna thleng avanga karhnih lirthei tlan an phal loh hnuah, Agartala-Khowai kawng hawn a ni a, kawng hawn leh aṭanga darkar reilote hnuah tribal mi 300 dawn chu Radhapur Police station bulah hian pungkhawmin police station hi an hual ta a ni. Pungkhawmte hi police-te chuan tear gas leh blank firing hmangin an hnawhdarh thei a ni. Buaina a chhuah zui lohna turin sorkar chuan SMS leh Internet service chu darkar 24 chhung an titawp nghal a, hei hi thla thum chhunga a ṭum thum thlenna a ni tawh a ni.

September 20 khan chin hriat lohadriver Jiban Debnath-a chu a bo a, a bo hma lawk hian a motor khalhah journalist 2 an chuan thu dawn a ni. Jiban-a bo chungchangah hian police te chuan Balendra Bebbarma chu nimin zing khan rinhlelh thil thuah a man a ni.

He thu hi an hriat ve leh a awmna khua ami mi 300 vel bawr chu Radhapur police station bulah hian rawn pungkhawm ta a ni. Mipui pungkhawm hian police te hi Balendra chhuahtir phutin an hual a, police lam hian mipui te chu nawrin an kaldarh duh loh avangin chuan tear gas hmanga hnawhdarh an tum ta a, van lam hawiin silai pawh vawi 5 an hmet puak nghe nghe a ni.

Police lam thuchhuahin a tarlan danin Balendra Debbarma hi IPTF supporter nia rinhlelh a ni. September 20-a Gana Mukti leh Parishad supporters te intihbuai chungchangah inhnamhnawiha rinhlelh a ni bawk a, driver Jiban Debnath chin hriat loha a bo chungchangah pawh a inrawlh rin a ni bawk.