Defence Minister Sitharaman-i'n Nathu La a tlawh

Defence Minister Nirmala Sitharaman-i chuan kar kalta Inrini khan Sino-India border-a Nathu La area a tlawh a, Indian Army leh Indo-Tibetan Border Police official-te meeting a neihpui.

Minister Sitharaman-i hi Nathu La area a tlawh bakah hian, China border-a awm Sikkim hmun hrang hrang tlawh tura ruahman a ni a, mahse khaw awm danin a zir loh avangin a kal thei ta lo a ni. Defence minister hian van sang aṭanga ramri hmun hrang hrangte enkual turin ruahmanna siam a, mahse duh anga khua a ṭhat tawk loh avangin cancel a nih thu, Sikkim sorkar chuan a tarlang bawk. Hetih rual hian Doklam-Nathu La area erawh a tlawh thei a ni.

Sitharaman-i hian ni khat chamin Sikkim hi a tlawh a, a cham chhung hian Sikkim Chief Minister Pawan Chamling, Chief of Eastern Command Lt Gen Abhay Krishna leh sorkar mi pawimawh eng emaw zat a kawm a, Vice-Chief of Army Lt Gen Sarath Chandra chuan a ṭawiawm a ni. Sikkim CM nen hian ramri chungchang bakah, West Bengal state

aṭanga Gorkha-te inlak hran duh avanga Sikkim mipuiten harsatna hrang hrang an tawhte an sawi dun. Sikkim CM chuan West Bengal aṭanga an state panna National Highway-10 danchah a nih avanga harsatna hrang hrang an tawh thu leh, sum an hloh hnem thu a sawi lang bawk.

Defence Minister hian a twitter-ah Sikkim a tlawh chung­chang hi a tarlang a, "Nathu La-a hun ka hman lai hian China sipaite chuan ramri aṭangin ka thla an lo la a ni" tiin a tarlang a, he hmun a tlawh hi China chuan a lo thlithlai uluk hle tih a sawi. China sipai-te'n camera hmanga Nirmala Sitharaman-i'n Nathu La a tlawh thla an lo lak chungchang hi Ministry of External Affairs pawhin a tarlang a, Sitharaman-i hian hmel nui sangin a thla lo laksaktute lam hawi hian a ban a pharchhuak a ni, a ti.

Nathu La hi tun hnaia India leh China sipaite inepna Doklam plateau kiang lawka awm a ni a, helai velah hian China sipaite chu an la che tla reng niin media-te chuan an tarlang.