Defence minister Sitharaman-i'n Assam a tlawh

Defence Minister Nirmala Sitharaman-i chuan Pathinni khan Assam a tlawh a, Tezpur-ah hun a hmang.

Defence minister hi Army Vice Chief Lt. General Sarath Chand leh Eastern Command Lt. Genenral Abhay Krishna-te' an ṭawiawm a, Tezpur Airforce Station-ah Gajraj Corps commander Lt Gen A.S. Bedi bakah, Army leh Air Force official-te nen meeting an nei. Meeting-ah hian hmarchhak hmun hrang hranga venhimna dinhmunte an sawiho a, ramria khauh zawka venhimna kalpui dan tur an sawiho bawk.

Minister chuan Air Warriors te chu Air Force Day anniversary vawi 85-na pualin duhsakna a hlan a, eastern airbase-ah hun a hmanpui bawk. Sitharaman-i hian Gajraj Corps headquarters pawh a tlawh nghal a, Lt. General Bedi chu Assam leh Arunachal Pradesh huam chhunga security kalpui dan chungchang a sawipui a ni. Hei bakah hian Solmara Military Station a tlawh bawk a ni.

Sitharaman-i hian kar kalta Inrini khan Sino-India border-a Nathu La area a lo tlawh tawh bawk a, Indian Army leh Indo-Tibetan Border Police official-te meeting a neihpui a ni. Ni khat chama Sikkim a tlawh chhung hian Chief Minister Pawan Chamling, Chief of Eastern Command Lt Gen Abhay Krishna leh sorkar mi pawimawh eng emaw zat a kawm a ni.

Defence Minister hian a twitter-ah Sikkim a tlawh chungchang hi a lo tarlang tawh a, "Nathu La-a hun ka hman lai hian China sipaite chuan ramri aṭangin ka thla an lo la a, heng mite lam hawiin hian hmel hlim pu chungin ka ban ka pharchhuak a ni" a ti.

Nathu La hi tun hnaia India leh China sipaite inepna Doklam plateau kiang lawka awm a ni a, Doklama India leh China sipaite an inep hnu khan he lai velah hian China sipaite chu an duty nia tarlan a ni.